Байыаннай дьайыы кыттыылааҕын бырааба чөлүгэр түһэрин борокуратуура хонтуруолга ылла

Уус Маайа борокуратуурата анал байыаннай дьайыы кыттыылааҕын суут бириистэптэрэ дьиэтиттэн таһаарбыттарын туһунан иһитиннэриини бэрэбиэркэлээтэ.

Борокуратуура быһаарбытынан, 2023 сыллаахха Уус Маайа бөһүөлэгин дьаһалтата бу киһиэхэ саахалланар туруктаах дьиэттэн көһөрүү бырагырааматынан дьиэ биэрбит. Бу туһунан СӨ Борокуратуурата иһитиннэрэр.

Ол эрээри, ити дьиэни биэрэр кэмнэригэр олохтоох дьаһалта уонна биир олохтоох дьахтар икки ардыгар сууттаһыы бара турар эбит. Апелляционнай суут ити дьиэни ол дьахтар бас билиитэ диэн билиммит. Ол суут быһаарыытыгар олоҕуран, суут бириистэптэрэ анал байыаннай дьайыы кытыылааҕын дьиэтиттэн таһаарбыттар.

Борокуратуура анал байыаннай дьайыы кыттыылааҕа олорор дьиэҕэ бырааба кэһиллибитин иһин Уус Маайа баһылыгар докумуон киллэрбит. Ону таһынан, муниципалитет киниэхэ атын дьиэни биэрэр эбээһинэстээҕин туһунан суукка ирдэбил ыыппыт (билигин суукка көрүллэ турар).

Билигин бу киһи дьаһалта биэрбит быстах кэмҥэ олорор дьиэтигэр олорор. Кини бырааба чөлүгэр түһэрин борокуратуура хонтуруолга ылла.