Байыаннай дьайыы кыттыылааҕын ийэтэ Луганскайга волонтерунан үлэлээбит

Нерюнгри олохтооҕо, байыаннай дьайыы кыттыылааҕын ийэтэ, «ZoV Севера» бөлөх көхтөөх чилиэнэ Татьяна Кириллова уоппускатын кэмигэр Луганскайга баар Саха сирин тирэх пуунугар волонтердаабыт.

Манна кини хас да ый повардаан, тирэх пуун үлэһиттэрин уонна өрөспүүбүлүкэттэн сылдьар байыаннай сулууспалаахтары аһаппыта.

“Үлэм кэлэктиибигэр махтанабын. Биир кэллиэгэм оннооҕор бэйэтин уоппускатын көһөрөн биэрбитэ, миигин Луганскайга үлэлээтин диэн, тоҕо диэтэххэ онно биир нэдиэлэҕэ буолбакка, кырата икки ыйга барыаххын наада, оччоҕо эрэ туһа тахсар», — диэн волонтер санаатын үллэһиннэ.

Татьяна Кириллова этэринэн, кинини тирэх пууҥҥа истиҥник көрсүбүттэр, ол эрээри саҥа үлэтин уратытыгар уһуннук үөрэммит: “Тирэх пууҥҥа тиийбиппэр, олус элбэх уол баар этэ. Ас астыыр ​​билиитэ суоҕа, 15 киһиэхэ биир мультиварка баара. Аны өссө инники кирбииттэн уолаттар кэлбиттэрэ. Барыларын аһатыахха наада этэ. Сотору кэминэн үөрэммитим, араас аһы астыыр ​​буолбутум”.

Күн аайы Татьяна сарсыардааҥы, эбиэт, киэһээҥи аһылыгы буһаран, байыастарга остуолларын бэлэмнээн кэбиһэрэ.

“Арассыыйа Оборуонатын министиэристибэтэ, биллэн турар, уолаттары үчүгэйдик хааччыйар. Ол гынан баран инники кирбиигэ сылдьар саллааттарга дьиэ аһа, сылааһа олус наада. Миэхэ саамай улахан наҕараада – астаабыт аспар саллааттар ис сүрэхтэн махтаналлара”, — диэн кэпсиир волонтер.

Нерюнгрига төннөн кэлэн, Татьяна күн аайы байыаннай дьайыы кыттыылаахтарыгар эбиэт астыырын салгыыр, ону кытта улахан уопсастыбаннай үлэни ыытар – Нерюнгри оройуонун биэнсийэлээхтэрин “Көхтөөх уһун үйэлэнии” түмсүүлэрин салайар, диэн суруйар Ил Дархан, бырабыыталыстыба пресс-сулууспата.