Байыаннай дьайыы кыттыылаахтара Арассыыйа социальнай пуондаларын доруобуйаны чөлүгэр түһэрэр  кииннэригэр барар айаннарын төлөбүрүн мэхэньиисимэ уларыйда

2026 сылтан байыаннай дьайыы кыттыылаахтара Арассыыйа социальнай пуондаларын доруобуйаны чөлүгэр түһэрэр кииннэригэр барар айаннарын төлөбүрүн мэхэньиисимэ кэҥээтэ.

Бырабыыталыстыба бэрэссэдээтэлин солбуйааччы Георгий Степанов брифинг кэмигэр чопчулаабытынан, демобилизацияламмыт бэтэрээннэр ороскуоттара толуйулларын таһынан, Социальнай пуонда кииннэригэр диэри уонна төннөн кэлэр айан билиэтин оҥорторуохтарын сөп. Бу, бары тырааныспарга көрүллэр. Төлөбүр саҥа барыйаана 2026 сылтан бэриллибит сайабылыанньаларга үлэлиир.

“Анал байыаннай дьайыы кыттыылаахтара 2025 сылтан мэдиссиинэ чөлүгэр түһэриитин уонна Арассыыйа социальнай пуондатын иһинэн үлэлиир доруобуйаны чөлүгэр түһэрэр кииннэргэ санаторнай эмтэниини ааһаллар. Бастакы группалаах инбэлиидинэстээх байыаннай дьайыы бэтэрээннэрэ эбэтэр мэдиссиинэ көрүүтүнэн арыаллааччыга наадыйааччылар арыалдьыттарын кытта бу тэрилтэлэргэ эмтэнэ барыахтарын сөп” – диэн Георгий Степанов бэлиэтээтэ.

Саха сиригэр байыаннай сулууспалаахтарга – анал байыаннай дьайыы кыттыылаахтарыгар, кинилэр дьиэ кэргэттэригэр аадырыстаах көмө үлэтэ салҕанар. Георгий Степанов иһитиннэрбитинэн, күн бүгүн 228 ыал олорор дьиэтин гааска холбууругар харчынан көмө оҥоһуллубут, байыаннай сулуспалаах 885 төрөппүтэ санаторнай-курортнай эмтэниигэ көмөнү туһаммыт. 646 киһиэхэ байыаннай сулууспалаах эмтэнэ сытар сиригэр барарыгар харчынан көмө көрүллүбүт.

“3112 социальнай уонна мэдиссиинэ өттүнэн доруобуйаны чөлүгэр түһэрии өҥөтө оҥоһулунна. 38 киһи суоппар идэтигэр үөрэнэригэр төлөбүр көрүлүннэ. 627 киһиэхэ дьиэҕэ социальнай хааччыйыы уонна полустационарнай көрүҥнэринэн социальнай өҥө оҥоһулунна” – диэн Георгий Степанов иһитиннэрдэ.

Бу туһунан Ил Дархан уонна Бырабыыталыстыба пресс-сулууспата суруйар.