Байыаннай дьайыы кыттыылаахтара бойобуой дьайыы бэтэрээнэ буолуохтара

Байыаннай дьайыы кыттыылаахтара бойобуой дьайыы бэтэрээнэ буолуохтара. Бу туһунан Владимир Путин бырабыыталыстыбаҕа сокуоҥҥа уларытыыны киллэрэр туһунан сорудахтаата.

«Байыаннай дьайыы кыттыылаахтарын  барыларын бойобуой дьайыы бэтэрээнин быһыытынан билинэр туһунан РФ сокуонугар уларытыыны киллэрэргэ», — диэн дойду бэрэсидьиэнэ Владимир Путин «Защитники Отечества» пуонда үлэһиттэрин кытта көрсөн иһитиннэрдэ. Бэриллибит дьаһал бу сыл кулун тутар 30 күнүгэр диэри толоруллуохтаах.  Ааспыт нэдиэлэҕэ дойду бэрэсидьиэнэ Владимир Путин «Защитники Отечества» үлэһиттэрин кытта көрсүбүтэ. Көрсүһүү кэмигэр кини байыаннай дьайыыттан кэлбит «Шторм Z» байыастарын бойобуой дьайыы бэтэрээнэ оҥорор туһунан сорудахтаабыта. Оттон хаайыыга олорон байыаннай дьайыыга дойдуну көмүскээн сулууспалыы барбыт дьоҥҥо бойобуой дьайыы бэтэрээнэ ааты иҥэрэр туһунан ыйытыыга кини маннык эппиэттээбитэ: «Бу туһунан элбэхтэ эппитим, дойду, норуот туһугар кини хантан тиийбитэ оруолу оонньообот. Ол курдук бойобуой дьайыы бэтэрээнэ ааты иҥэриигэ эмиэ сыһыаннаах. Мин манна кыһалҕа баарын көрбөппүн», — диэбит.

Маны сэргэ, сокуоҥҥа уларытыылар киириэхтэрин наадатын ыйбыт. Ол курдук, 2024 сыл кулун тутар 11 күнүттэн байыаннай дьайыыга алта ыйтан кырата суох ДНӨ, ЛНӨ  Норуодунай милициятыгар, Донецкай уонна Луганскай норуодунай өрөспүүбүлүкэлэр байыаннай уорганнарын  сөргүтүүгэ сылдьыбыт дьону аармыйаттан босхолуур туһунан эттэ.

РФ Судаарыстыбаннай сэбиэтин хамыыһыйатыгар «Государственное и муниципальное управление» хайысханан РФ субъектарын баһылыктарыгар муус устар 7 күнүгэр диэри, байыаннай дьайыы кыттыылаахтарыгар, кинилэр дьиэ кэргэттэрин чилиэннэригэр социальнай өйөбүл миэрэлэрин көрүү уонна баазабай ыстандаарт быһыытынан оҥоруу туһунан сорудахтаата.