Байыаннай дьайыы кыттыылаахтара  мусуойдарга босхо сырыттылар

Өрөспүүбүлүкэҕэ бу сыл 9 ыйыгар судаарыстыбаннай мусуойдарга босхо сылдьар быраабынан байыаннай дьайыы 2140 кыттыылааҕа уонна кинилэр дьиэ кэргэттэрин чилиэннэрэ туһаннылар.  

“Эрэгийиэн бибилэтиэкэлэрэ уонна мусуойдара  байыаннай дьайыы устуоруйатыгар аналлаах быыстапкалары тэрийэллэр. Ол курдук, сыл бастакы аҥаарыгар эрэгийиэннээҕи уонна муниципальнай мусуойдар базаларыгар байыаннай дьайыы туһунан 27 быыстапка экспозицията туруорулунна. Манна 7,3 тыһыынча киһи сырытта”, — диэн СӨ Култуураҕа уонна духуобунай сайдыыга министиэристибэтэ иһитиннэрэр.

Ол курдук, СӨ Национальнай ойуулуур-дьүһүннүүр мусуойа «Великая Отечественная Война: Герои/Антигерои»; П.А.Ойуунускай аатынан Саха сиринээҕи судаарыстыбаннай литературнай мусуой  «Биһиги кэммит дьоруойдара» быыстапкалары; “Мин устуоруйам” мусуой комплекса «Дьоруойдар дьиэ кэргэттэрэ» хаартыска быыстапкатын тэрийбиттэрэ.

Аныгы усулуобуйаҕа ураты суолтаны байыаннай дьайыы кыттыылаахтарын уонна кинилэр дьиэ кэргэттэрин биир кэлим өйөөһүн ылар.

СӨ Култуураҕа уонна духуобунай сайдыыга министиэристибэтэ патриоттуу тыыны иитиигэ хайысхаламмыт тэрээһиннэри ыытар. Маннык көҕүлээһиннэр сүрүн тускулларынан  култуура кыаҕын социализация уонна уйулҕаны сааһылааһын үнүстүрүмүөнүн быһыытынан туһаныы буолар. Бу үлэҕэ үтүө холобурунан  СӨ Опера уонна балет судаарыстыбаннай тыйаатырын үлэтэ-хамнаһа буолар. Билигин тыйаатыр “Чайковский. Фест”  опера-балет бэстибээлин ыыта сылдьар. Манна баҕалаах дьоҥҥо, ол иһигэр байыаннай дьайыы кыттыылаахтарыгар, босхо маастар-кылаастар уонна Москва, Санкт-Петербург оператын уонна балетын сулустарын кытары айар көрсүһүүлэр тэрилиннилэр.

Байыаннай дьайыы кыттыылаахтара уонна кинилэр дьиэ кэргэттэрэ  тыйаатыр испэктээкиллэригэр уонна кэнсиэртэригэр сылдьалларыгар 100 бырыһыаннаах чэпчэтии көрүллэр.

Култуура атын да тыйаатырдара,  тэрилтэлэрэ байыаннай дьайыы кыттыылаахтарыгар кэккэ тэрээһиннэри ыыталлар, Донбасска көмөлөһөр уонна өйүүр аһымал аахсыйаларга, дьаарбаҥкаларга кытталлар.

Эрэгийиэн мусуойдарын үлэлэрин өссө биир хайысхатынан байыаннай дьайыы кыттыылаахтарын, дьоруойдарын ааттарын үйэтитиигэ архыыпка иһитиннэриилэри хомуйуу буолар.

СӨ Ил Дарханын уонна бырабыыталыстыбатын пресс-сулууспата