Байыаннай дьайыы кыттыылаахтарыгар аналлаах мемориал тутуллуоҕа

Саха сиригэр анал байыаннай дьайыы кыттыылаахтарын дьоруойдуу быһыыларын үйэтитэр сыаллаах мемориальнай комплекс бырайыагын оҥорууга архитектурнай куонкурус биллэриллиэҕэ.

Бу көҕүлээһини өрөспүүбүлүкэтээҕи хамыыһыйа мунньаҕар Ил Дархан, бырабыыталыстыба дьаһалтатын салайааччы Георгий Михайлов иһитиннэрдэ. Кини дьоруойдарын кэриэстэрэ мемориалга эрэ буолбакка, бэчээккэ, сыыппара архыыбыгар, түмэллэргэ эмиэ үйэтитиллиэхтээх, манна уопсастыбаннай хамсааһыннар, Аҕа дойду буойуннарын дьиэ кэргэттэрин кэмитиэтэ, «Аҕа дойдуну көмүскээччилэр» пуонда, уо.д.а. бары кыттыһыахтаахтар диэн эттэ.

Мемориальнай комплекс Дьокуускайга тутуллуоҕа. Маны тэҥэ, улуустарга эмиэ үйэтитии үлэтэ ыытыллыахтаах.

Анал байыаннай дьайыы кыттыылаахтарын кэриэстэрин үйэтитиигэ өрөспүүбүлүкэтээҕи хамыыһыйа 2025 сыл олунньу 20 күнүгэр Ил Дархан сорудаҕынан тэриллибитэ. Хамыыһыйа байыастар ааттарын үйэтитиигэ былаас уонна бэйэни салайыныы уорганнарын, уопсастыбаннай түмсүүлэр үлэлэрин, бииргэ алтыһыыларын тэрийэр, көмөлөһөр сыаллаах.