Байыаннай дьайыы кыттыылаахтарыгар бэйэ дьыалатын сайыннарыыга көмөлөһүөхтэрэ

Дойду Бэрэсидьиэнэ Владимир Путин «Аҕа дойдуну көмүскээччилэрэ» судаарыстыбаннай пуонда үлэһиттэрин уонна байыастарын кытта көрсүһүүгэ судаарыстыба өттүттэн хас да саҥа өйөбүллэр миэрэлэрэ оҥоһуллалларын туһунан кэпсээтэ.

Бастатан туран,  Бэрэсидьиэн өлбүт байыастар сокуоннай саастарын ситэ илик оҕолоругар төлөбүрдэри аныыр туһунан этиини өйөөтө. Манна сокуоннай саастарын ситэ илик оҕолор ортолоругар өйөөһүҥҥэ наадыйаччылара үксүлэрэ устудьуоннар. Маны таһынан социальнай өйөбүл миэрэлэрин сокуоннай саастарын ситэ илик бырааттарыгар, эдьиийдэригэр уонна өлбүт буойуттар дьиэ кэргэттэрин чилиэттэригэр эмиэ тарҕатыахтара.

Иккиһинэн, сураҕа суох сүппүт байыастар чугас дьоно «Аҕа дойдуну көмүскээччилэрэ» пуондаттан өйөбүлү ылыахтара. РФ Бэрэсидьиэнэ Владимир Путин туһааннаах Ыйаахха бу бэнидиэнньиккэ  илии баттыырга эрэннэрбитэ. Маны таһынан психологическай көмөҕө эмсэҕэлээбиттэр уонна өлбүт байыастар аймахтара туһаныахтарын сөп.

Үсүһүнэн, байыаннай дьайыы кыттыылаахтарын уонна кинилэр дьиэ кэргэттэрин өйөөһүн биир стандартын оҥорууга үлэ ыытыллыаҕа. Тоҕо диэтэххэ билигин даҕаны дойду хас биирдии субъегар өйүүр дьаһаллар тэҥэ суохтар. Судаарыстыба баһылыга хас биирдии эрэгийиэн бэйэтин суолталаах дии санаабыт өйөбүлүн бу стандартка эбэрин бэлиэтээтэ.

Төрдүһүнэн, байыас бэйэтин дьыалатын сайыннарыыга социальнай хантараак бырагырааматын чэрчитинэн туспа хайысха көрүллүөҕэ. Бүгүҥҥү күҥҥэ бу хайыасхаҕа уустук быһыыга- майгыга түбэспит уонна тиийинэн олоруу алын кээмэйиттэн намыһах дохуоттаах дьон эрэ туһанар кыахтаахтар, онон социальнай хантараагы түһэрсиигэ байыастар кыайан кыттар кыахтара суох.