Байыаннай дьайыы кыттыылаахтарыгар борокуруор ирдэбилинэн сир учаастактара бэрилиннилэр

Нам улууһун борокуратуурата байыаннай сулууспалаахтар социальнай өйөбүл миэрэлэрин ылар бырааптарын тутуһууну бэрэбиэркэлээтэ.

Нам улууһун дьаһалтата өр кэмҥэ  байыаннай дьайыы кыттыылаахтарыгар уонна кинилэр дьиэ кэргэттэригэр босхо бас билиигэ сир учаастагын биэриигэ үөскээбит уочараты суох оҥорорго дьаһаллары ылбатаҕа быһаарылынна. Онон сибээстээн, борокуратуура улуус баһылыгын аатыгар этии киллэрдэ, салгыы суукка Нам улууһун дьаһалтатыгар 2024 сыллаахха сир учаастагын ыларга сайабылыанньа түһэрбит байыаннай дьайыы үс кыттыылааҕар кэһиилэри туоратар эбээһинэһи сүктэрилиннэ.

Нам оройуонун суута борокуруор ирдэбилин толору билиннэ. Суут быһаарыыта олоххо киирдэ – сир учаастактара үс байыаннай сулууспалаах бас билиитигэр бэрилиннэ. Маны  таһынан борокуратуура этиитинэн, уопсайа 47  байыаннай дьайыы кыттыылааҕар уонна кинилэр 17 дьиэ кэргэттэригэр сир учаастактара босхо бас билиигэ оҥоһулунна. Бу хайысхаҕа үлэ салҕанар.