Байыаннай дьайыы кыттыылаахтарыгар, кинилэр дьиэ кэргэттэригэр 35 000 өҥө оҥоһулунна

Байыаннай дьайыы кыттыылаахтарыгар уонна кинилэр дьиэ кэргэттэригэр социальнай-психологическай киин уопсайа 35 000 көмө өҥөтүн оҥордо.

Бу туһунан «Актуальное интервью» бырагыраамаҕа Ыччат уонна социальнай коммуникацияларга миниистирин бастакы солбуйааччы Надежда Мохначевская иһитиннэрдэ.  Ол курдук киин психологтара 2022  сыл кулун тутар 1 күнүттэн байыаннай дьайыы кыттыылаахтарын, кинилэр дьиэ кэргэттэрин кытта быыстала суох үлэни ыыталлар.

«Бу кэм устатыгар киин үлэһиттэрэ уопутурдулар. Манна уйулҕа өттүнэн өйөбүл, арыаллааһын уонна исписэлиистэр сүбэлэрэ-амалара киирэр», — диэтэ Надежда Мохначевская.

Бэлиэтээн эттэххэ, ахсынньы 16 күнүгэр, «Регион для молодых» бырагыраамаҕа, «Үөрэхтээһин» национальнай бырайыак чэрчитинэн, саҥардыллыбыт уйулҕа киинин арыллыыта буолбута. Биэс этээс тухары уйулҕа үлэһиттэрин кэбиниэттэрэ, саалалар, коворкинг хостор о.д.а аныгылыы, тупсаҕай эйгэ оҥоһуллубута.