Байыаннай дьайыы кыттыылаахтарыгар, кинилэр дьиэ кэргэттэригэр уйулҕа өттүнэн көмө АСИ цифровой платформаҕа холбонуоҕа
Муус устар 5 күнүгэр Ил Дархан Айсен Николаев «Подходы к внедрению Регионального социального стандарта в 2023 году» диэн панельнай сиэссийэҕэ кытынна.
Тэрээһин сыала — уопут атастаһыыта, боппуруостары быһаарыы. Сиэссийэ онлайн киэбинэн ыытылынна. Манна Уһук Илин эрэгийиэннэр бары кытыннылар.
Тэрийээччилэр уонна кыттаачылар болҕомтолорун Саха сиригэр байыаннай дьайыы кыттыылаахтарыгар уйулҕа өттүнэн көмөнү оҥоруу тарта.
«Сүрүн болҕомто байыаннай дьайыы кыттыылаахтарыгар уонна кинилэр дьиэ кэргэттэригэр уйулҕа өттүнэн көмөнү оҥорууга, чөлгө түһэриигэ ууруллар. Бүгүҥҥү күҥҥэ уйулҕа киинэ 5,5 тыһыынча көмөнү оҥорбут«, — диэн бэлиэтээтэ Ил Дархан.
2035 сылга диэри социальнай-экэнэмиичэскэй сайдыы стратегията ылылынна. Бу стратегия киһи олоҕун хаачыстыбатын тупсарыыга туһуланар. Олунньу ыйтан Саха сирин арктическай улуустарыгар мэдиссиинэ көмөтүн оҥорууга пилотнай бырайыак оҥоһуллар. Ол курдук, ыраах тайаан сытар нэһилиэктэргэ, улуустарга мобильнай биригээдэлэр тиийэллэр.
«Икки ый устата мобильнай быраастар 12 тыһыынча кэриҥэ киһини көрдүлэр, эмтээтилэр. Бу үөрүйэҕи Арктика, ону сэргэ дойду ыраах сытар сирдэргэ үксэтэр санаалаахпыт», — диэтэ Ил Дархан.
Сообщить об опечатке
Текст, который будет отправлен нашим редакторам: