Байыаннай дьайыы кыттыылаахтарыгар — мэдиссиинэ көмөтө

Саха сиригэр мэдиссиинэ көмөтүнэн байыаннай дьайыы 4 152 кыттыылааҕа туһанна.

Бу туһунан СӨ доруобуйа харыстабылын министиэристибэтин нэһилиэнньэҕэ мэдиссиинэ көмөтүн оҥорууну тэрийии Департамены салайар Дьулустан Чичахов иһитиннэрэр.

—Таһыттан сылдьан эмтэнии, чэбдигирии 2 957 байыаннай сулууспалаахха оҥоһулунна, балыыһаҕа сытан эрэ 1 244 киһи эмтэннэ. Байыаннай дьайыы 405 кыттыылааҕа мэдиссиинэ реабилитациятын ааста. Психотерапевтическай уонна психиатрическай көмө 830 киһиэхэ уонна кинилэр дьиэ кэргэттэригэр (1056 киһиэхэ) оҥоһулунна. Быйыл диспансеризацияҕа 1075 киһи сырытта. Байыаннай дьайыы бэтэрээннэригэр «Облачнай поликлиника» мэдиссиинэ кэлим көмөтүн, өйөбүлүн сервиһэ үлэлиир. Бу өҥөнөн бэтэрээннэр туһаныахтарын сөп, — диэн этэр кини.

Маны таһынан Саха сирин миэдиктэрэ ДНӨ Докучаевскайга көмөнү оҥоруулара салҕанарын бэлиэтээн эттэ. Миэдиктэр 1400 тахса эпэрээссийэни оҥорбуттар. Ыкса сибээс олохтоммут куоратыгар билигин хирург уонна анестезиолог-реаниматолог быраас үлэлииллэр. Маны сэргэ Докучаевскайга уонна Кировскайга ДНӨ Саха сириттэн офтальмолог-быраастар үлэлээбиттэрэ. Кинилэр 700 тахса эпэрээссийэни оҥорбуттар.

Сиһилии: https://www.sakha.gov.ru/news/16282

СӨ Ил Дарханын уонна Бырабыыталыстыбатын пресс-сулууспата