Байыаннай дьайыы кыттыылаахтарыгар саҥа чат-бот арылынна

Саха Өрөспүүбүлүкэтин Инновацияҕа, сыыппара  сайдыытыгар уонна инфокоммуникационнай технологияларга министиэристибэтэ байыаннай дьайыы кыттыылаахтарын уонна кинилэр дьиэ кэргэттэрин өйүүргэ саҥа чат-боту билиһиннэрдэ.

Саҥа үнүстүрүмүөнү «Кыайыыга бииргэ!» өрөспүүбүлүкэтээҕи хамыыһыйа суһал штабын сорудаҕынан оҥордулар.
«Саҥа иһитиннэрэр чат-бот бэлэмин туһунан үөрэ-көтө иһитиннэрэбит. Чат-бот  Telegram мессенджергэ t.me/helpsvo14bot аадырыска аһыллар. Өрөспүүбүлүкэ олохтоохторо манна федеральнай уонна эрэгийиэн таһымыгар оҥоһуллар 142 өйөбүл дьаһалларын туһунан билсиэхтэрэ», – диэн министиэристибэҕэ иһитиннэрдилэр.
Туһанаааччылар кинилэри интэриэһиргэппит ыйытыылары талыахтарын сөп, онуоха чат-бот өйөбүл туһунан толору иһитиннэриилэри уонна судаарыстыбаннай өҥө биир кэлим порталын сайтыгар көһөр кыаҕы биэрэр.
Чат-боту хайыы үйэ бүгүҥҥүттэн үлэлэтэллэрэ былааннанар.

СӨ Ил Дарханын уонна бырабыыталыстыбатын пресс-сулууспата