Байыаннай дьайыы кыттыылаахтарыгар сир учаастагын босхо биэриэхтэрэ

Байыаннай эпэрээссийэ кыттыылаахтарыгар Саха сиригэр сир учаастагын босхо биэриэхтэрэ. Бу туһунан “Якутия 24” телеханаал эрэгийиэн Баайга-дуолга сыһыаннаһыыга министиэристибэтин пресс-сулууспатыгар сигэнэн иһитиннэрдэ.

Билигин биэдэмистибэ оҥорбут сокуон барылын  быһыытынан, байыаннай дьайыы кыттыылаахтарыгар уонна өлбүт буойуттар  дьиэ кэргэттэригэр сир учаастага бэриллэр буолуоҕа.

Сокуон барыла билиҥҥитэ  өрөспүүбүлүкэ бырабыыталыстыбатын таһымыгар биэдэмэстибэлэр икки ардыларынааҕы сөбүлэһии түһүмэҕэр сылдьар. Алтынньы бүтүүтүгэр-сэтинньи саҥатыгар СӨ Судаарыстыбаннай мунньаҕын (Ил Түмэн) норуодунай дьокутааттарын көрүүтүгэр киллэриллиэҕэ.