Байыаннай дьайыы кыттыылаахтарыгар үөрэх бырагыраамата саҕаланна

Бүгүн, сэтинньи 10 күнүгэр, Дьокуускайга байыаннай дьайыы кыттыылаахтарыгар аналлаах «СВОй бизнес» үөрэтэр бырагыраама үөрүүлээх аһыллыыта буолла.

Бырагырааманы Саха Өрөспүүбүлүкэтин Урбаан, эргиэн уонна туризм министиэристибэтин көҕүлээһининэн «Мин биисинэһим» киин, Саха сирин Урбааны сайыннарар пуондатын, Дьоҕус уонна орто урбаан федеральнай корпорациятын, «Биир ньыгыл Арассыыйа» баартыйа кэмитиэтин, «Арассыыйаҕа тирэҕэ» дьоҕус уонна орто урбаан Бүтүн Арассыыйатааҕы уопсастыбаннай тэрилтэтин Саха сиринээҕи салаатын уонна «Аҕа дойдуну көмүскээччилэр» пуонданы кытта кыттыһан тэрийдэ, диэн «Мин биисинэһим» киин иһитиннэрдэ.

«Биһиги урбаанньыттарга сайдыыларын араас кэрдиис кэмнэригэр сүбэнэн-аманан көмөлөһөбүт, урбаан үлэтигэр-хамнаһыгар наадалаах билиини-көрүүнү ылалларыгар өйүүбүт. Байыаннай дьайыы кыттыылаахтарыгар чэпчэтиилээх микрокирэдьиит биэрэр аналлаах бырагыраама оҥоһулунна, ону тэҥэ үөрэх бырагыраамата түмүктэммитин кэннэ бырайыак кыттыылаахтарын арыаллыыбыт», — диэн Уурбаан, эргиэн уонна туризм миниистирэ Георгий Андреев эттэ.

Бырагыраама түмүгүнэн бастыҥ бырайыактар эспиэрдэр дьүүллүүр сүбэлэрин иннигэр көмүскэниэхтэрэ. Кыайыылаахха саҥа дьыаланы саҕалыырыгар 200 тыһыынча солкуобай суумалаах граны туттарыахтара. «Биир ньыгыл Арассыыйа» баартыйа урбаан бырайыагын координатора Ольга Григорьева мустубут дьоҥҥо бырагыраама кыахтарын туһунан иһитиннэрдэ уонна Саха сиригэр урбаанньыттарга сайдыыларын бары кэрдиис кэмнэригэр көмөлөһөр күүстээх инфраструктура баарын бэлиэтээтэ. «Аҕа дойдуну көмүскээччилэр» пуонда Саха сиринээҕи салаатын салайааччыта Алексей Александров «СВОй бизнес» бырагыраама ураты аналлааҕын эттэ.