Байыаннай дьайыы кыттыылаахтарын 2 тыһ. тахса оҕолоро уһуйаан төлөбүрүттэн босхолоннулар

Саха сиригэр Үөрэх уонна билим министиэристибэтэ байыаннай дьайыы кыттыылаахтарыгар уонна кинилэр дьиэ кэргэттэригэр өйөбүл 11 миэрэтин олоххо киллэриини салгыыр. Бу туһунан СӨ Үөрэҕин уонна билимин миниистирин бастакы солбуйааччы Ньургун Павлов брифинг кэмигэр иһитиннэрдэ.

Ол курдук, оскуола иннинээҕи үөрэх тэрилтэлэригэр оҕону көрүүгэ-харайыыга төрөппүттэртэн хомуллар төлөбүртэн 2 188 оҕо босхолонно. Итини таһынан, оскуола иннинээҕи саастаах 62 оҕо олорор сирдэринэн чугас уһуйааҥҥа көһөрүлүннэ. Уһуйаан суукканы быһа үлэлиир бөлөҕөр 8 оҕо сылдьар буолла. Оскуола саастаах оҕолордоох дьиэ кэргэттэргэ эмиэ ураты болҕомто ууруллар. Ол курдук: 72 оҕо олорор дьиэлэригэр чугас оскуолаларга көһөрүлүннэ; 3 964 үөрэнээччи босхо итии аһылыгынан хааччылынна; 486 оҕо уһатыллыбыт күн бөлөхтөрүгэр сылдьар уонна төрөппүт төлөбүрүттэн босхолонно; бүгүҥҥү туругунан, эбии үөрэхтээһин бырагыраамаларыгар 2 964 оҕо дьарыктанар.