Байыаннай дьайыы кыттыылаахтарын дьиэ кэргэттэригэр оттук мас бэлэмнээтилэр

Сунтаар улууһун дьаһалтатын, тыа хаһаайыстыбатын, үөрэҕирии, култуура о.д.а. управлениелар үлэһиттэрэ салайааччы Анатолий Григорьев тула түмсэн, биир сомоҕо буолан күргүөмнээх субуотунньукка таҕыстылар.

Байыаннай дьайыыга сулууспалыы  сылдьар биир дойдулаахтарбыт дьиэ кэргэттэригэр көмө быһыытынан оттук маһы бэлэмнээтилэр. Барыта сүүстэн тахса киһи кыттыыны ылла.

Күүстээх үлэ быыһыгар «Партизан» норуот айымньытын театральнай киинин айар бөлөҕө ырыа ыллаан бэлэх уунна, бириистээх араас көрдөөх күрэхтэр буоллулар. Үлэ дьонун итии миининэн уонна итии чэйинэн аһаттылар.

Үлэ түмүгүнэн байыаннай дьайыыга сылдьар, онно олохторун толук уурбут биир дойдулаахтарбыт дьиэ кэргэттэригэр анаан көмө оҥоһулунна.

Сунтаар улууһун дьаһалтатын пресс-сулууспата