Байыаннай дьайыы кыттыылаахтарын дьиэ кэргэттэрин быыстапката арылынна

Бүгүн, ыам ыйын 15 күнүгэр,  «Защитники Отечества» Арассыыйатааҕы пуонда Дьокуускайдааҕы филиалыгар байыаннай дьайыы кыттыылаахтарын дьиэ кэргэттэригэр анаммыт быыстапка аһыллыыта буолла. Быыстапка «Память воинов СВО» дьиэ кэргэттэрин сойуустарын көҕүлээһининэн тэрилиннэ. Тэрээһиҥҥэ Ил Түмэн сүбэ мунньах бэрэссэдээтэлин солбуйааччы Александр Подголов, «Память воинов СВО» сойуус бэрэссэдээтэлэ Жанна Грекова, байыаннай дьайыы бэтэрээннэрэ уонна «Память воинов СВО» сойуус чилиэннэрэ кыттыыны ыллылар.

Быыстапка туһунан санаатын «Память воинов СВО» сойуустарын бэрэссэдээтэлэ, СӨ Уопсастыбаннай балаата чилиэнэ  Жанна Валентиновна Грекова санаатын үллэһиннэ:

— Бүгүҥҥү быыстапкаҕа байыаннай дьайыыга хорсуннук олохторун толук уурбут байыастар дьиэ кэргэттэрин хаартыскалара турда.  Бу байыаннай дьайыы кыттыылаахтарын дьиэ кэргэттэригэр анаммыт бастакы быыстапка буолар, манна 32 мэтириэти туруордубут. Фотограф — Сергей Новоселов. Быыстапкабыт сыала-соруга — байыастарбыт дьиэ кэргэннээхтэр, оҕолордоохтор, сиэннэрдээхтэр, бу дьон кинилэр сырдык ааттарын үйэтитэр туһугар олороллор диэн суолталаах буолар. Бүгүҥҥү тэрээһиммит Аан дойдутааҕы дьиэ кэргэн күнүгэр түбэспитэ мээнэҕэ буолбатах.

Быыстапка хаартыскаларын фотограба Сергей Аркадьевич Новоселов:

— Мин сүрүннээн тэрээһиннэргэ, бырааһынньыктарга ыҥырыыга сылдьан хаартыскаҕа түһэрэбин. Бу бырайыак үлэтин сыл анараа өттүгэр саҕалаабыта. Байыаннай дьайыы кыттыылаахтарын дьиэ кэргэттэрин хаартыскаҕа түһэрии үлэтигэр көрсүбүт уустуктарым үлэм судургутугар сыппыта. Хаартыскаҕа түһэрэрбэр дьон араастык хамсанааччы. Оттон манна барыта судургу буолан уустук этэ.