Байыаннай дьайыы кыттыылаахтарын дьиэлэрин ититиигэ холбонууларыгар көмө оҥоһуллуоҕа

СӨ Үлэҕэ уонна социальнай сайдыыга миниистирэ Елена Волкова брифинг кэмигэр иһитиннэрбитинэн, Ил Дархан Айсен Николаев дьаһалынан, байыаннай дьайыы кыттыылаахтарыгар уонна кинилэр дьиэ кэргэттэригэр өйөбүл миэрэлэрэ оҥоһуллаллар.

«Бу өйөбүл үс хайысхалаах. Ол курдук, гаас ситимигэр  уонна киин ититиигэ холбонуу бырагыраамалара буолаллар. Ол эбэтэр судаарыстыба бүддьүөтүттэн уот ситимин нөҥүө ититиигэ холбонуу эмиэ киирэр. Бу — Мииринэй, Ленскэй, Өлүөхүмэ, Ньурба, Сунтаар оройоуннарыгар», — диэн этэр Елена Волкова.

Миниистир иһитиннэрбитинэн, гаастааһын үлэтэ 2022  сылтан саҕаламмыт. Гаас ситимигэр 97 байыаннай дьайыы кыттыылаахтарын дьиэ кэргэттэрэ холбоммуттар. Онтон 12 ыал быйыл холбоммут. Онон бүгүҥҥү күҥҥэ киин ититиигэ холбонуу өҥөтүнэн байыаннай дьайыы 12 кыттыылааҕа туһаммыт.