Хаартыска: СИА
“Саха” НКиХ, “Якутия” тэлэбиисэр ханаалларыгар уонна “Тэтим” араадьыйаҕа быһа эпииргэ өрөспүүбүлүкэ Бырабыыталыстыбатын отчуотугар байыаннай дьайыы кыттыылааҕа доруобуйатын ханна уонна хайдах чөлүгэр түһэрэрин туһунан ыйытыы киирдэ.
Өрөспүүбүлүкэ вице-премьерэ Георгий Степанов Саха сиригэр байыаннай дьайыы кыттыылаахтарын уонна кинилэр дьиэ кэргэттэрин өйүүр киэҥ хабааннаах дьаһаллар олоххо киллэриллэллэрин туһунан эттэ.
«Бу боппуруоска байыаннай дьайыы кыттыылаахтара уонна бэтэрээннэрэ “Дойдуну көмүскээччилэр” судаарыстыба пуондатын салаатыттан уонна өрөспүүбүлүкэ социальнай көмүскэлгэ органнарыттан ыйыталаһыахтарын сөп. Санаторийга-курортка доруобуйаны чөлүгэр түһэрии туһунан судаарыстыбаннай өҥөлөр порталларын уонна РФ социальнай пуондатын килийиэннэри кытары үлэлиир сулууспатын нөҥүө билсиэхххэ эмиэ сөп”, — диэтэ Георгий Степанов.
Кини иһитиннэрбитинэн, 2023 сыл кулун тутарыгар Ил Дархан Айсен Николаев быһаарыытынан, байыаннай дьайыы кыттыылаахтарын өйүүргэ биэдэмэстибэлэр икки ардыларынааҕы хамыыһыйа тэриллибитэ.
Өрөспүүбүлүкэҕэ үлэ үс сүрүн хайысханан ыытыллар. Ол – мэдиссиинэ уонна социальнай реабилитациялар, киэҥ эйгэни хабар социализация.
«Доруобуйаны чөлүгэр түһэрии биһиэхэ сүрүннээн Өрөспүүбүлүкэтээҕи 1 №-дээх балыыһаҕа-Мэдиссиинэ национальнай киинигэр уонна мэдиссиинискэй реабилитация, успуорт мэдиссиинэтин өрөспүүбүлүкэтээҕи киинигэр ыытыллар. Ону таһынан, Москва уобалаһыгар баар “Бэс Чагда” санаторий эмиэ бу хайысханан үлэлиир. Ону сэргэ, өрөспүүбүлүкэ мэдиссиинэтин бары тэрилтэлэригэр эмтэниэххэ сөп”, — диэтэ вице-премьер.
Георгий Степанов бэлиэтээн эппитинэн, 2025 сыл тохсунньу 1 күнүттэн өрөспүүбүлүкэ тас өттүгэр социальнай пуонда доруобуйаны чөлүгэр түһэрэр 12 киинигэр уонна санаторийдарга, курортарга доруобуйаны чөлүгэр түһэриэххэ сөп.
Саха сиригэр социальнай реабилитация үлэтэ Дьокуускайга, Нерюнгрига, Өлүөхүмэ уонна Ньурба улуустарыгар доруобуйаны чөлүгэр түһэрэр кииннэр, ону сэргэ Амма, Өлөөн уонна Орто Халыма улуустар нэһилиэнньэни социальнай харыстааһын биир кэлим кииннэрин базаларыгар ыытыллар.
Үһүс хайысха – анал байыаннай дьайыы кыттыылаахтарын уонна кинилэр дьиэ кэргэттэрин чилиэннэрин идэҕэ үөрэтии уонна үлэҕэ ылыы. Бу боппуруоһунан нэһилиэнньэ дьарыктаах буолуутугар өрөспүүбүлүкэтээҕи судаарыстыбаннай кэмитиэт күүскэ дьарыктанар. Ураты болҕомто инбэлиит-бэтэрээннэр үлэлээх буолалларыгар ууруллар. Ол курдук, өрөспүүбүлүкэтээҕи техникум-интэринээт идэҕэ хайысхалыыр үлэни ыытар уонна үөрэтэр.
«Байыаннай дьайыы кыттыылаахтарын биир кэлим реабилитациялааһын уонна социализация чэрчитинэн, билигин ыытар үлэбит – саҕалааһын эрэ. Бырабыыталыстыба, судаарыстыбаннай былаас ситэриилээх органнара, олохтоох бэйэни дьаһаныы органнара улахан үлэни ыытыахтара”, — диэн Георгий Степанов бэйэтин этиитин түмүктээтэ.
«Полярные авиалинии» АХ Өлүөнэ өрүс туруутун саҕана бөртөлүөтүнэн рейстэри оҥорорго бэлэмин туһунан иһитиннэрдэ. Өрүс туруутун…
Ол курдук, Арассыыйаҕа кэргэнниилэр тус-туһунан биирдии Дьиэ кэргэн ипэтиэкэтин ылалларын тохтотуохтара. Эрэ уонна ойоҕо биир…
Ааспыт нэдиэлэҕэ куоракка арыгы бородууксуйатын батарыы быраабылатын уонна "алкотуочукалар" өттүлэриттэн кэһиилэр тахсыбыттарын туппуттар. Бу туһунан…
Бу ааспыт күннэргэ Саха сирин үгүс улуустарыгар үгэскэ кубулуйбут муҥха буолла. Онон олохтоохтор кыстыыр балыктарын…
Бүгүн сарсыарда Амма улууһугар киһи өлүүлээх суол быһылаана таҕыста. Бу туһунан олохтоох Госавтоиниспиэксийэ иһитиннэрдэ. Сарсыарда …
Федерация Сэбиэтин федеративнай тутулга, эрэгийиэн бэлиитикэтигэр, олохтоох салайыныыга кэмитиэтин уонна Хоту дойду дьыалаларын бэрэссэдээтэлин солбуйааччы…