“Бары бииргэ Кыайыыга!”

Былырыыҥҥыттан саҕалаан байыаннай дьайыы кыттыылаахтарын, кинилэр дьиэ кэргэттэрин өйөөһүнү иилиир-саҕалыыр, ону тэҥэ анал тэриллэринэн уонна кыайыыны ситиһэргэ туох баар наадалааҕынан хааччыйар “Бары бииргэ Кыайыыга!” хамыыһыйа үлэлиир.  

Бу туһунан ”Саха” НКИХ быһа эпиирин кэмигэр бырабыыталыстыба отчуоттуур мунньаҕар эрэгийиэн бырабыыталыстыбатын бэрэссэдээтэлэ Кирилл Бычков эттэ.

“Биһиги байыастарбыт дьиэ кэргэттэрэ өрөспүүбүлүкэ өттүттэн толору өйөбүллээхтэрин билэллэрин туһугар саҥаттан саҥа дьаһаллар оҥоһуллан, бигэргэтиллэн иһэллэр. Ол эбэтэр ОДьКХ өҥөлөрүгэр, байыастар уонна кинилэр кэргэттэрин, оҕолорун үөрэхтэригэр, дьиэ-уот бырагыраамаларыгар уонна төлөбүрдэргэ чэпчэтии көрүллэр. Байыастар мэдисиинискэй, социальнай реабилитацияларыгар улахан болҕомто ууруллар.

Бары госпиталлары кытта сөбүлэҥнэри түһэристилэр, онно бырабыыталыстыба чилиэннэрин, волонтердары кытта биригээдэлэр айанныыллар.

Быйыл Аҕа дойду Улуу сэриитигэр Кыайыы 80 сылын бэлиэтиибит. Бу суолталаах сабыытыйа        билиҥҥи кэм саамай сүрүн сыалын – байыаннай дьайыыга  кыайыыны кытта сөп түбэһиэҕин олус баҕарыа этибит”, — диэтэ Кирилл Бычков.