Байыаннай дьайыы кыттыылаахтарын кэриэһигэр бильярдка өрөспүүбүлүкэ турнира буолан ааста

Аҕа дойду Улуу сэриитин кыттыылааҕа Егор Балбахов, анал байыаннай дьайыы кыттыылаахтара Айаал Балбахов, Валентин Кутейкин кэриэстэригэр бильярдка өрөспүүбүлүкэ турнира буолан ааста.

Турнир аһыллыытыгар тэрийээччи Виссарион Балбахов:  “2015 сыллаахха, Аҕа дойду Улуу сэриитин кыттыылааҕа, Псков уобалаһыгар сураҕа суох сүппүт эһэбин Егор Егорович Балбаховы булбутум. Псков куораттан 45 килэмиэтирдээх Стремутка сэлиэнньэтигэр 216-с нүөмэринэн харалла сытара. Онон 2015 сылтан эһэм кэриэһигэр турнир ыытабын” – диэн эттэ.

Валентин Кутейкин олунньу 13 күнүгэр 2006 сыллаахха элбэх оҕолоох ыалга күн сирин көрбүт. Дьылҕа хаан ыйааҕынан? Дьааҥы улууһун Элгэс сэлиэнньэтигэр Людмила Дмитриевна, Александр Христофорович Слепцовтар оҕо иитэр дьиэ кэргэҥҥэ улааппыт. Валентин Элгэс оскуолатыгар үөрэнэр сылларыгар үтүө суобастаах, үөрэҕэр ситиһиилээх, көхтөөх, туруоруммут соругун ситиһэр, сытыы-хотуу, эт-хаан өттүнэн күүстээх үөрэнээччи быһыытынан бэйэтин көрдөрбүт. Иллэҥ кэмигэр бултуурун, балыктыырын сөбүлүүрэ диэн Дьааҥы улууһун бэрэстэбиитэлэ иһитиннэрдэ. Оскуола кэнниттэн Дьокуускайдааҕы тутуу-хомунаалынай тиэхиньикумугар үөрэнэ киирбит. Быйыл саас ыам ыйыгар байыаннай дьайыыга хантараак баттаһан, үөрэҕиттэн академическай уоппуска ылбыт. Атырдьых ыйын 18 күнүгэр байыаннай сорудаҕы толоро сылдьан суох буолбут.

Айаал Балбахов ахсынньы 4 күнүгэр 1994 сыллаахха Өлүөхүмэ улууһун Улахан Муҥку сэлиэнньэтигэр төрөөбүт. Тиэхиньикум кэнниттэн Тиихэй акыйаан флотугар сулууспалаабыт. 2022 сыллаахха балаҕан ыйыгар байыаннай дьайыыга ыҥырыллар, байыаннай сорудаҕы толоро сылдьан ахсынньы 10 күнүгэр суох буолар. “Тыыннарын толук уурбуттары биһиги — аймахтар, чугас дьон өрүү өйдүү-саныы сылдьар ытык иэстээхпит” – диэн Виссарион Дмитриевич тэрээһин аһыллыытыгар бэлиэтээн эттэ.

Балбаховтар дьиэ кэргэн аатыттан Виссарион Дмитриевич Бүлүү куорат, Кэбээйи нэһилиэгин бильярдка кулууптарыгар билдьярд наборун бэлэхтээтэ.

Кыайыылаахтар, миэстэлэспиттэр

Эр дьоҥҥо:

1. Эверстов Алексей Анатольевич (Дьааҥы улууһа)
2. Гоголев Алексей Михайлович (Дьааҥы улууһа)
3. Федоров Илья Александрович (Дьокуускай к.)
4. Потапов Никита Николаевич (Томпо улууһа).

Бэтэрээннэргэ (50-тан үөһэ саастаахтар):

1. Семенов Сергей Кириллович (Дьокуускай к.)
2. Макаров Петр Семенович (Дьокуускай к.)
3. Софронов Андрей Иванович (Дьокуускай к.)
4. Максимов Николай Иванович (Бүлүү улууһа).

Бэтэрээннэргэ (60-65 саастаахтар):

1. Федоров Юрий Иванович (Үөһээ Бүлүү улууһа)
2. Томскай Михаил Семенович (Бүлүү улууһа)
3. Иннокентьев Артур Федотович (Дьокуускай к.)
4. Егоров Семен Антонович (Мэҥэ Хаҥалас улууһа).

Бэтэрээннэргэ (66-тан үөһэ саастаахтар):

1. Иванов Алексей Борисович (Өлүөхүмэ улууһа)
2. Румянцев Афанасий Васильевич (Уус Алдан улууһа)
3. Бочкарев Николай Павлович (Мэҥэ Хаҥалас улууһа)
4. Саввинов Николай Егорович (Ньурба улууһа).

Дьахталларга:

1. Бельчусов Мария Константиновна (Дьокуускай к.)
2. Платонова Екатерина Револьевна (Хаҥалас улууһа)
3. Божедонова Александра Авсентьевна (Дьокуускай к.).

Эр дьоҥҥо кыайыылаахтар туһааннааҕынан Stihl мас эрбиир эрбии, генератор, от охсор хотуур, дьахталлар иистэнэр массыына, пылесос, микроволновай оһох курдук сыаналаах бириистэри тутан үөрүүлэрэ өссө үрдээтэ.

“Саамай кырачаан кыттааччы” анал ааты Никита Семенов (Дьокуускай к, 2012 с.т.), “Саамай саастаах кыттааччы” анал ааты Борис Иванов (Үөһээ Бүлүү улууһа, 1945 с.т.) ылан, турнир бочуоттаах ыалдьыта, Афганистан сэриитин бэтэрээнэ Семен Семенов сэртипикээтинэн наҕараадаланнылар.

Бу иннинээҕи турнирдар икки категориянан ыытыллар эбит буоллахтарына, быйылгы тэрээһин биэс категориянан барда. Аан маҥнай ыытылларыгар 27 киһи кыттыбыт эбит буоллаҕына, быйылгы VIII  турнирга өрөспүүбүлүкэ араас улуустарыттан барыта 127 кыттааччы кэлэн күрэхтэстэ. Онон турнир таһыма сыллата үрдээн, далааһына кэҥээн иһэрин туоһулуур.

Тэрийээччи В.Д.Балбахов тус бэйэтин, дьиэ кэргэнин аатыттан Өлүөхүмэ улууһун дьокутааттарын сэбиэтигэр, Улахан Муҥку нэһилиэгин олохтоохторугар, доҕотторугар, Людмила Дмитриевна, Александр Христофорович Слепцовтарга, Дьааҥы улууһун олохтоохторугар, Елена Петровна уонна Дмитрий Дмитриевич Балбаховтарга көмөлөрүн иһин махталын биллэрэр.

Турнир салгыы даҕаны ыытылла турдун диэн кыттааччылар баҕа санааларын биллэрэллэр.