Байыаннай дьайыы кыттыылаахтарын оҕолоро үөрэххэ туттарсыыларын туһунан
Сыл саҕаланыаҕыттан эрэгийиэннээҕи 122 «суһал лиинньийэҕэ» 24,5 тыһыынчаттан тахса киһи төлөпүөнүнэн эрийдэ. Ааспыт нэдиэлэҕэ ордук элбэх ыйытыы хантараагынан сулууспа, байыаннай сулууспалаахтары кытары сибээстэһии, уоппускаҕа кэлээччилэргэ авиабилиэттэри булуу туһунан киирбит. Маны таһынан байыаннай дьайыыга сылдьар дьон оҕолорун үөрэххэ туттарсыыларыгар сыһыаннаах ыйытыы элбээбитин туһунан эрэгийиэннээҕи 122 “суһал лииньийэни” салайар Мария Винокурова иһитиннэрдэ.
«Байыаннай дьайыы кыттыылаахтарын оҕолоро бакалавриат уонна специалитет бырагыраамаларынан туспа кубуотанан үөрэххэ киириэхтэрин сөп. Кубуота бүддьүөт суотугар көрүллэр, исписээлинэстэринэн эбэтэр бэлэмнээһин хайысхаларынан үрдүк үөрэххэ ылыы ыйбыт хонтуруолунай сыыппаратын 10 % кээмэйиттэн аҕыйаҕа суох. Байыаннай дьайыы кыттыылаахтарын оҕолоро БКЭ түмүгүнэн биитэр туттарсар тургутуу бэрээдэгинэн киирэллэр. Ол гынан баран ити квота иһигэр киирэр оҕолору кытары куонкурустаһаллар», – диэн Мария Винокурова эбэн эттэ.
Чэпчэтиинэн туһанан үөрэххэ киирэр бырааптаах дьон испииһэгэ кэҥиир. Туспа кубуота иһинэн туттарсар тургутуута (вступительные испытания) суох Арассыыйа дьоруойдара, Хорсун быһыы үс уордьанынан наҕараадаламмыттар, байыаннай дьайыыга сылдьан өлбүт биитэр оһолломмут, байыаннай дьайыы кэмигэр ыалдьыбыт дьон оҕолоро үөрэххэ киирэр бырааптаахтар.
Ирдэнэр докумуоннар:
- Бэйэни туоһулуур докумуон;
- Үөрэҕи туоһулуур докумуон;
- Туспа кубуотаҕа хапсар бырааптааҕын туоһулуур докумуон;
- СНИЛС (баар буоллаҕына);
- Тус ситиһиилэри туоһулуур докумуоннар.
Сообщить об опечатке
Текст, который будет отправлен нашим редакторам: