Байыаннай дьайыы кыттыылаахтарын оҕолоругар 665 истипиэндьийэ ананна

Саха сиригэр анал байыаннай дьайыы кыттыылаахтарын уонна кинилэр дьиэ кэргэттэрин өйүүр дьаһаллар чэрчитинэн барыта 665 анал истипиэндьийэ, ол иһигэр үрдүк үөрэх — 247 уонна орто үөрэх устудьуоннарыгар —  418 ананнылар. Бу туһунан ыам ыйын 27 күнүгэр брифинг кэмигэр СӨ Үөрэҕин уонна билимин миниистирин бастакы солбуйааччы Михаил Присяжнай иһитиннэрдэ.

«Байыаннай сулууспалаахтар дьиэ кэргэттэрин уонна кыттааччыларын оҕолоругар быйыл анаан кубуота бэриллиэҕэ. 10 %- тан итэҕэһэ суох кубуота бакалавриат уонна специалитет бүддьүөт миэстэлэригэр киирэллэригэр туһуланар», — диэтэ Михаил Присяжнай.

Кини хас биирдии үөрэх тэрилтэтин саайтыгар туспа кубуотанан бэриллэр миэстэлэр ахсаана ыйыллыбытын, ону тэҥэ эбии көмөнү оҥорор быраабы туоһулуур ыспыраапкалар көрүҥнэрин билиһиннэрии баарын туһунан эттэ.

Бигэргэммит болдьоҕунан СКЭ уонна БКЭ туттарыы ыытыллар. 9-с кылаас уонна 11-с кылаас үөрэнээччилэрэ салгыы үрдүк үөрэххэ уонна кэллиэскэ киирэргэ бэлэмнэнэллэр. Бэс ыйын 20 күнүттэн докумуоннары тутуу саҕаланар.

Михаил Присяжный сайыбылыанньа биэрэргэ хас да ньыма баарын санатта: электроннайдык — «Поступление в вуз онлайн» «Госуслуги» портал уонна сирэй көрсөн, докумуоннары приемнай хамыыһыйаҕа  аҕалан биэрии уонна «Почта России» нөҥүө.

Миниистир бастакы солбуйааччыта итини сэргэ Саха сиригэр халаан уутуттан эмсэҕэлээбит нэһилиэнньэлээх пууннар оҕолоро сайыҥҥы сынньалаҥнара, ол иһигэр байыаннай дьайыы кыттыылаахтарын оҕолоругар эмиэ лааҕырдар тэриллибиттэрин туһунан иһитиннэрдэ.

Санатан эттэххэ, төрөппүттэр СӨ Үөрэҕин уонна билимин министиэристибэтин нөҥүө өйүүр дьаһаллар, интэриэһиргиир ыйытыктары итии лииньийэ нүөмэригэр эрийэн ыйыталаһыахтарын сөп: 506-989.

 СӨ Ил Дарханын уонна бырабыыталыстыбатын пресс-сулууспата