Байыаннай дьайыы кыттыылаахтарын оҕолоругар үөрэх систиэмэтигэр 5000 кэриҥэ социальнай өйөбүл оҥоһуллубут

Бу туһунан балаҕан ыйын 27 күнүгэр СӨ үөрэҕин уонна наукатын миниистирин бастакы солбуйааччы Михаил Присяжнай иһитиннэрдэ.

«Үөрэх систиэмэтигэр уопсайа 5000 кэриҥэ социальнай өйөбүл байыаннай дьайыы кыттыылаахтарын оҕолоругар СӨ Аҕа баһылыгын Айсен Николаев дьаһалынан оҥоһулунна», – диэн иһитиннэрдэ Михаил Присяжнай.

Бүгүҥҥү күҥҥэ үөрэххэ ылар хамыыһыйа үлэтин түмүгүнэн, өрөспүүбүлүкэбит кэллиэстэригэр, техникумнарыгар  91 байыаннай дьайыы кыттыылааҕа уонна кинилэр дьиэ кэргэттэрэ үөрэнэ киирдилэр. Үгүстэр мэдиссиинэ уонна педагогика хайысхатыгар Дьокуускайга, Нерюнгригэ, Намҥа, ону сэргэ Саха сирин хомунаалынай-тутуу техникумугар, Мииринэйдээҕи техническэй кэллиэскэ киирбиттэр. Кини бэлиэтииринэн, өрөспүүбүлүкэ үрдүк үөрэҕин кыһаларыгар 73 киһи, олортон 55-һэ ХИФУ-га киирии эксээмэни туттарбакка киирбит.

Маны сэргэ, 386 устудьуоҥҥа үөрэх кыһата ханна баарыттан,  устудьуон үөрэҕэр хайдаҕыттан тутулуга суох үрдүк истипиэндьийэ төлөнөр.