Байыаннай дьайыы кыттыылаахтарын уонна кинилэр дьиэ кэргэттэрин урбааны өйүүр “СВОе дело” бырагыраамаҕа кыттарга ыҥыраллар

“СВОе дело|14” үөрэтэр бырагыраамаҕа сайаапкалары ылыы саҕаланна. Бу бырайыак урбаан төрүттэрин баһылыырга, бэйэ дьыалатын арыйарга көмөлөһүөҕэ.

Бырагыраама СӨ Урбааҥҥа, эргиэҥҥэ уонна туризмҥа министиэристибэтин “Мой бизнес” киининэн олоххо киирэр. Биисинэс-идиэйэлээх дьоҥҥо олус туһалаах буолуоҕа.

Манна кыттарга байыаннай дьайыыттан кэлбит бэтэрээннэр, бойобуой дьайыылар инбэлииттэрэ, ону тэҥэ кинилэр дьиэ кэргэттэрэ — кэргэннэрэ, төрөппүттэрэ уонна 14 диэри саастаах оҕолоро ыҥырыллаллар. Бырагыраама чэрчитинэн кыттааччылар бэйэ дьыалатын сайыннарыыларын стратегиятын оҥоруохтара, оттон бастыҥ биисинэс-идиэйэ 200 тыһ. солк. граны ылыаҕа.

Онон, 2026 сыл кулун тутар 16 күнүттэн 20 күнүгэр диэри үбү-харчыны салайыыга, юридическай билиигэ, нолуокка уонна бородууксуйаны батарыыга үөрэниэхтэрэ.

Манна кыттарга бу дьыл олунньу 3 күнүттэн кулун тутар 1 күнүгэр диэри РФ дьоҕус уонна орто урбааҥҥа цифровой платформатын нөҥүө анкета-сайаапканы толоруҥ уонна биисинэс-идиэйэҕитин суруйуҥ.

Кыттааччылар өйөбүлү уонна сүбэни МАХ мессенджеринэн маннык төлөпүөнүнэн ылыахтарын сөп: 8-924-599-01-17. Ону тэҥэ өйөбүл миэрэлэрин, тэрээһиннэр тустарынан: 8-800-100-58-80.

Былырыын бырагыраама кыайыылааҕынан Дьокуускай к. 26 №-дээх оскуолатын историяҕа учуутала Айал Мохначескай буолбута. Кини үөрэнээччилэргэ репетитор киинин бырайыагын оҥорбута, грант ылбыта.

Үөрэтэр бырагыраамалар Владимир Путин көҕүлээбит “Эффективная и конкурентоспособная экономика” национальнай  бырайыагын  “Малое и среднее предпринимательство и поддержка индивидуальной предпринимательской инициативы” бырагырааматынан ыытыллаллар.  Бырайыак СӨ Ил Дарханын Айсен Николаев олохтоох оҥорон таһаарыыны уонна туризмы сайыннарар туһунан стратегическай ыйааҕын толорууга ананар.