Байыаннай дьайыы кыттыылаахтарын үлэнэн хааччыйаллар

Сыл саҕаланыаҕыттан Саха сиригэр  байыаннай дьайыы 96 кыттыылааҕа уонна 182 кинилэр дьиэ кэргэттэрин чилиэнэ үлэнэн хааччылынна. Бу туһунан ахсынньы 2 күнүгэр ыытыллыбыт брифиҥҥэ Нэһилиэнньэ дьарыктаах буолуутун киинин дириэктэрин солбуйааччы Игорь Соловьев иһитиннэрдэ.

«Байыаннай эпэрээссийэ кыттыылаахтарыттан үгүстэрэ Дьокуускай куоракка, Горнай, Хаҥалас, Бүлүү уонна Ньурба улуустарыгар суоппар, машинист, слесарь, харабыл идэлэринэн үлэҕэ киирдилэр. Оттон байыаннай дьайыы кыттыылаахтарын дьиэ кэргэттэрин чилиэннэрэ үксүн Дьокуускайга, Мииринэй, Нерюнгри, Кэбээйи уонна Бүлүү оройуоннарыгар үлэ булуннулар», — диэн Игорь Соловьев бэлиэтээтэ. Кини иһитиннэрбитинэн, байыаннай дьайыы 51 кыттыылааҕа массыына суоппарын, слесарь, электромонтер, уус-уран оҥоһуктар маастарын (столяр), харабыл идэлэригэр үөрэххэ ыытыллыбыттар. Оттон 16 дьиэ кэргэттэрин чилиэнэ пуобар, иистэнньэҥ, социальнай үлэһит, хочуолунай операторын куурустарыгар үөрэммиттэр. Ону таһынан, өрөспүүбүлүкэ дьарыктаах буолуу кииннэрэ бьайыаннай кыттыылаахтарыгар уонна кинилэр дьиэ кэргэттэригэр идэҕэ туһаайыыга, социальнай адаптацияҕа уонна психологическай өйөбүлгэ көмө оҥороллор.

Санатан эттэххэ, Саха сирэ РФ субъектарыттан биирдэстэринэн байыаннай дьайыы кыттыылаахтарын үлэнэн хааччыйыыга үлэ миэстэтин кубуоталыыр миэрэни киллэрбитэ. 2012 сылтан «Саха Өрөспүүбүлүкэтигэр үлэни булууга ыарахаттары көрсөр гражданнары үлэнэн хааччыйыыга үлэ миэстэлэрин кубуоталыыр туһунан» сокуон үлэлиир. 2023 сыл муус устар ыйыгар кубуотанан туһанар гражданнар категорияларыгар «Байыаннай дьайыы кыттыылаахтара уонна кинилэр дьиэ кэргэттэрин чилиэннэрэ» диэн эбии киллэриллибитэ. Былаан быһыытынан, тэрилтэлэргэ олохтоммут кубуотанан быйыл байыаннай дьайыы 914 кыттыылааҕа уонна дьиэ кэргэттэрин чилиэннэрэ үлэ булуннулар. Былаан толору туолла.