Байыаннай дьайыы зонатыгар 15 тиэхиньикэни ыытыахтара

«Кыайыыга бииргэ!» өрөспүүбүлүкэтээҕи хамыыһыйа байыаннай сулууспалаахтары эбии хааччыйыыга былааннаах үлэтин салгыыр. Кэлэр нэдиэлэҕэ байыаннай дьайыы зонатыгар 15-кэ тиийэ тиэхиньикэни ыытыахтара. Бу туһунан брифиҥҥэ хамыыһыйа суһал ыстаабын координационнай киинин салайааччыта, Донбасска көмөлөһөр уонна өйүүр Хотугулуу-Илиҥҥи пуонда салайааччыта Георгий Куркутов иһитиннэрдэ.

«Кэлэр нэдиэлэҕэ Бырабыыталыстыба, Үп министиэристибэтин өйөбүллэринэн фроҥҥа анаммыт, бэлэм турар 15-кэ тиийэ улахан таһаҕаһы тиэйэр массыыналары ыытарга былаанныыбыт. Тырааныспар сириэстибэлэрэ тэхиниичэскэй өттүнэн бэлэмнэр. Ону таһынан, бу күннэргэ аадырыстаах баһыылкалары, тустаах оройуоннар уонна судаарыстыбаннай тэрилтэлэр гуманитарнай таһаҕастарын, ол иһигэр волонтердар оҥоһуктарын тиэрдии барар. Бүгүҥҥү күҥҥэ систиэмэ олохтоммут, биһиги байыастарбытыгар тиэрдии мэхэньииһимэ үлэлиир, тирэх пууннар үлэһиттэрэ Москватааҕы суһал ыстаап Ростов уобалаһыгар баар бэрэстэбиитэлистибэтин салайыытынан маннык үлэни ыыталлар», – диэн Георгий Куркутов эттэ.

Киин салайааччыта иһитиннэрбитинэн, олох ыарахан балаһыанньатыгар түбэспит байыаннай сулууспалаахтарга бары өттүнэн көмө оҥоһуллар, ону таһынан байыаннай дьайыы кыттыылаахтарын дьиэ кэргэттэрин ыйытыыларынан туруорсууларын сүрүннээһин үлэтэ барар.

«Бүгүҥҥү күҥҥэ координационнай киин нэһилиэнньэни тутар уонна муниципальнай тэриллиилэргэ сылдьан үлэлиир. Бириэмэтин уонна миэстэтин эрдэттэн кэпсэтэн баран, исписэлиистэри кытта тиийэн, нэһилиэнньэни миэстэтигэр тутарга бэлэммит. Холобур, ааспыт нэдиэлэҕэ Мэҥэ-Хаҥалас улууһун Аллараа Бэстээҕэр муниципальнай тэриллии баһылыгын уонна дьаһалтатын көмөтүнэн дьону-сэргэни тутуу буолбута. Маннык үлэни кэлэн иһэр Фашизмы утары пуорум чэрчитинэн Хаҥалас улууһугар ыытарга былаанныыбыт», – диэн кини үллэһиннэ.

Георгий Куркутов этэринэн, көмө пуондатын үлэһиттэрэ туспа кыраапыгынан үлэ кэлэктииптэригэр тиийэн дьон иннигэр отчуоттууллар, ыйытыыларга хоруйдууллар.

«Донбасска көмөлөһөр уонна өйүүр Хотугулуу-Илиҥҥи пуонда аһаҕас, үлэтин туһунан иһитиннэрэргэ бэлэм», – диэн пуонда салайааччыта бэлиэтээтэ.