Байыаннай дьайыыга аналлаах саҥа мэтээлгэ кубуота көрүлүннэ

«Боевое братство без границ» аан дойдутааҕы пуонда «Саха волонтердара» хамсааһыҥҥа «Жене участника СВО» мэтээлинэн наҕараадалыырга кубуота көрдө.

Бу мэтээлинэн волонтердуур, дьоҥҥо көмөлөһөр, байыаннай дьайыы кыттыылааҕын ойоҕо наҕараадаланыан сөп. Онон волонтерскай хамсааһыннар, улуус дьаһалталара сөптөөх хандьыдаат баар буоллаҕына, тустаах докумуоннары «Саха волонтердара» хамсааһыҥҥа ыытыахтарын сөп.

Хандьыдааттарга ирдэбил маннык:

• Хандьыдаат волонтер хамсааһыныгар кыттыытын бигэргэтэр 2-3 хаартыската;
• Волонтерскай түмсүү, этэрээт, хамсааһын координатора илии баттааһыннаах хандьыдаат волонтерскай үлэтин туһунан хадатаайыстыба;
• Хандьыдаат волонтерскай ыстааһа – 1 сылтан итэҕэһэ суох буолуохтаах;

Хадатаайыстыба докумуоннарын 2025 сыл атырдьах ыйын бүтүөр диэри ылыллаллар. Өскөтүн элбэх сайаапка киирдэҕинэ, Саха сиригэр бэриллэр кубуотаны өссө элбэтиэхтэрин сөбүн туһунан пуондаҕа эттилэр.

Сиһилии «Саха волонтердара» хамсааһын колл-кииниттэн билсиэххитин сөп: +7 915 466-52-26.