Байыаннай дьайыы зонатыгар өссө биир УАЗ массыынаны тиксэрдилэр

Соторутааҕыта  байыаннай дьайыы зонатыгар баар Саха сирин тирэх пуунун үлэһиттэрэ «Илин» сэриилэр бөлөхтөрүн штурмалыыр подразделениетын байыастарыгар Донбасска көмө уонна өйөбүл Хотугу-Илиҥҥи пуондатыттан фроҥҥа кэлбит өссө биир УАЗ-фургон массыынаны туттардылар.

Бу туһунан нэдиэлэтээҕи брифиҥҥэ байыаннай дьайыы зонатыгар баар Саха сирин тирэх пууннарын сүрүн координатора «Юстас» позывнойдаах иһитиннэрдэ. «Бу күннэргэ биһиги тирэх пууннарбытыттан Саха сириттэн сылдьар байыаннайдарга 128 анал баһыылка тиэрдилиннэ. Өрөспүүбүлүкэттэн байыастарга анаан өссө 187 аадырыстаах баһыылканы туттубут. Тирэх пууннар үлэһиттэрэ Норуот сомоҕолоһуутун күнүнэн бэлэх набордарын тиэрдиигэ туруннулар», – диэн «Юстас» бэлиэтээтэ.

Спикер иһитиннэрбитинэн, ДНӨ-гэр баар тирэх пуун өрөмүөннүүр бөлөҕө биир «Якт-Сокол» квадроциклы аармыйа кэккэтигэр төнүннэрдэ. «Биһиги механиктарбыт өрөмүөннүүр-чөлүгэр түһэрэр үлэлэрин түмүктээн, байыаннай дьайыыга сылдьар өссө түөрт тиэхиньикэни толору бойобуой бэлэм гынан байыаннайдарга төнүннэриэхтэрэ», – диэн анал байыаннай эпэрээссийэ ыытыллар зонатыгар баар Саха сирин тирэх пууннарын сүрүн координатора «Юстас» позывнойдаах чуолкайдаата.