Байыаннай дьайыыга кытта сылдьар Өймөкөөн улууһун уолаттарын баһылыктар тиийэн көрүстүлэр

Бу күннэргэ Өймөкөөн улууһун баһылыгын э.т. Иван Максимов, Өймөкөөн уонна уонна Төрүт нэһилиэктэрин баһылыктара Павел Васильев уонна Владимир Алексеев  байыаннай дьайыы буола турар сирдэригэр тиийэн биир дойдулаахтарын көрүстүлэр. 

Иван Максимов улуус олохтоохторо хомуйан ыытар гуманитарнай көмөлөрүн  80%-на, тустаах аадырыстаах дьоҥҥо  тиийбэтин бэлиэтээн туран, бу күннэргэ чугас дьонноруттан уонна биир дойдулаахтарыттан гуманитарнай  баһыылкалары хомуйан, биир дойдулаахтарын үгүстэрин көрсөн тиэртилэр. Уолаттар, ким хайдах кэлэрэ кыалларынан,  улуус бэрэстэбиитэллэрин  сирэй көрсөн, дойдуларын сылааһынан илгийэр сонуну истэн, гуманитарнай көмөнү ылан бардылар.

— Барыахпыт иннинэ улахан бэлэмнэнии үлэтин ыыппыппыт. Ол курдук, Өймөкөөн улууһуттан сылдьар уолаттар баар аадырыстарын чопчулаабыппыт, 2 мөлүйүөн солкуобайы улууспут тэрилтэлэриттэн уонна көмүс хостуур артыаллартан хомуйбуппут. Маны таһынан, гуманитарнай көмөнү улуустааҕы байыаннай дьайыы кыттыылаахтарын өйүүр пуонда үбүнэн атыыласпыппыт. «Өймөкөөн» кэмиэрчэскэйэ суох тэрилтэ чилиэннэрэ уонна улуустааҕы биир дойдулаахтар түмсүүлэрэ бары нэһилиэктэртэн хомуйбут үптэринэн бу айан-сырыы оҥоһулларыгар улахан өйөбүлү оҥордулар. Улуус дьаһалтатын аатыттан байыаннай дьайыыга баран кэлиибитигэр көмөлөспүт Өймөкөөн улууһун олохтоохторугар,  “Богуславец”,  “Поиск Золото” АУо салалталарыгар, улуус урбаанньыттарыгар өйөбүллэрин иһин барҕа махталбытын тиэрдэбит. Бу маннык үтүмэн үп хомуллан, Тымныы полюһа Өймөкөөн улууһун уолаттарыгар квадроцикл, икки носуостаах массыына бырысыабын, аптамаат компенсатордарын, тепловизордары, электрогенератордары атыылаһан илиилэригэр туттардыбыт. Маны таһынан, ичигэс таҥаһы, Өймөкөөнтөн аҕалбыт дьарҕаабытын уонна убаһа этин ыыһаан илдьэн биэрдибит. Улуус эмчиттэрэ ыыппыт «аптечкаларын»,  оройуон оскуолаларын үөрэнээччилэрин суруктарын тутан ыччаттарбыт олус үөрдүлэр. Түгэнинэн туһанан, барҕа махталбытын Сунтаар улууһун баһылыга Анатолий Григорьевка тиэрдэбит. Кини байыаннай чаастарынан сылдьар массыына биэрэн өйөөтө. Уопуттаах суоппар Максим Березин Өймөкөөн улууһун уолаттара баар сирдэринэн илдьэ сылдьыбытыгар эмиэ улахан махталбытын тиэрдэбит, — диэн Иван Максимов махтал тылларын анаата.

Бу суолталаах сырыы туһунан улуустааҕы «Северная заря» хаһыат телеграм-ханаала сырдатта.