Байыаннай дьайыыга кыттыы туһунан ыспыраапканы ылыы бэрээдэгэ судургутуйар

Сэтинньи 1 күнүттэн анал байыаннай дьайыыга (СВО) кыттыы туһунан ыспыраапканы «Госуслуги» портал нөҥүө ылыахха сөп буолар.

Бу туһунан уурааҕы дойду Бырабыыталыстыбатын бэрэссэдээтэлэ Михаил Мишустин илии баттаата.
Билиҥҥэ диэри байыаннай дьайыыга кыттыы туһунан ыспыраапканы байыаннай чаастар эбэтэр военкоматтар хамандыырдара бэйэлэрэ араастык суруйан биэрэр буолаллара. Бу барыта анал байыаннай дьайыы кыттааччыларыгар уонна аймахтарыгар наадалаах ыспыраапканы ылалларыгар дьыаланы уустугурдан биэрэрэ.

Илии баттаммыт уураах «Госуслуги» портал нөҥүө байыастарга уонна кинилэр аймахтарыгар ыспыраапка ылыытын чэпчэтэр эрэ буолбакка, биир кэлим ыспыраапка көрүҥүн киллэрэр. Ыспыраапка көмөтүнэн эрэгийиэннээҕи былаастар олохтообут араас социальнай өйөбүллэрин туһанар судургутуйар.