ВИДЕО: Байыаннай дьайыыга монокөлүөһэ көмөтө улахан

Аспыт ыйтан Дьокуускай куорат Орджоникидзе 10-гар баар «Боевые шелкопряды» хамсааһын эвакуационнай тэлиэгэлэри оҥорор тэрилтэ салайааччытын кытары дуогабардаһан инники күөҥҥэ сылдьар уолаттарбытыгар, штурмовой биригээдэлэргэ, эвакуационнай пууннарга үлэлиир мэдиссиинискэй рота байыастарыгар көлүөһэлээх наһыылка оҥотторбута.

Монокөлүөһэлэри оҥотторо охсон ыытан эрэллэр. Бу туһунан «Боевые шелкопряды» хамсааһын салайааччыта Вера Егорова кэпсиир: «Ахсынньы ый саҥатыгар Биир кэлим координационнай Киин үлэһиттэрин Гаврил Птицын, Георгий Куркутов уонна эрэллээх суоппарбыт Алексей Антоев көмөлөрүнэн тиийиэ диэн эрэнэбит. Бу эвакуационнай наһыылка «Катюша» диэн ааттаах. Аҕа дойду Улуу сэриитин кэмигэр номоххо киирбит ырыа аатынан ааттанан турар. Бу күннэргэ Дмитрий Павлов икки монокөлүөһэни аҕалан туттарда. Биһиги төһөлөөх элбэх оҕолорбутугар күүс-көмө буоларын бар дьонум өйдөөн, бу тэрилтэ салайааччытын Дмитрий Павловы өйүөхтэрэ, көмөлөһүөхтэрэ диэн эрэнэбин. Биһиги Орджоникидзе уулуссатын 10-гар баар филиалбыт көҕүлээһинэн үс монокөлүөһэ оҥоттордубут. Маныаха Амма улууһун Эмис нэһилиэгиттэн Новиковтар, Николаевтар оҕолоро сиэннэрэ спонсордаан , «Боевые шелкопряды» салайааччыта, Сергей Васильев, Марияна Кузьмина харчынан кыттыһан уонна Үөһээ Бүлүү улууһуттан Алексей Поскачин көмөлөһөннөр оҥоһуллан бүтэн, аны тиийэрэ хаалла. Амма улууһун дэлэгээссийэтигэр Дмитрий Носовка туттаран ыытыахпыт. Биир бастакы монокөлүөһэбитин Норуоттар сомоҕолоһууларын күнүгэр барбытын үөрэн туран бэлиэтиибит. Байыаннай дьайыы бүтэн, эйэлээх олох эргийдин, уолаттарбыт, оҕолорбут этэҥҥэ эргиллэн кэлиэхтэрэ диэн эрэнэбит!».

Видеону «Хирург» тиксэрдэ.