Байыаннай дьайыыга сылдьар байыас дьиэтин тиэргэнин хаарын ыраастыырга көмөлөстүлэр

Байыаннай дьайыыга сылдьар Дьокуускай куорат олохтооҕун дьиэ кэргэнин тиэргэнин хаарын ыраастыырга Норуодунай фронт уопсастыбанныктара көмөлөстүлэр.

Дьокуускайга Норуодунай фронт уопсастыбанныктара, Росгвардия үлэһиттэрэ уонна оскуола оҕолоро элбэх оҕолоох дьиэ кэргэн тиэргэнин хаарын ыраастаан биэрдилэр.  Гагаринскай уокурук элбэх оҕолоох ийэтэ, байыаннай дьайыы байыаһын кэргэнэ Саха сирин Норуодунай фронт хос бэрэссэдээтэлэ Дмитрий Паньковка сибээскэ тахсан олбуорун хаарын ыраастыырга көмөлөһөллөрүгэр көрдөспүт.

«Биһиги элбэх оҕолоох ийэ көрдөһүүтүн тута ылыммыппыт. Билигин көмө көрдөөһүн үксэ дьиэ-уот үлэтин кыһалҕатын боппуруостарыгар сыһыаннаах буолла. Биһиэхэ Росгаврдия үлэһиттэрэ кыттыстылар, ону сэргэ элбэх оҕолоох ийэ оҕотун кылааһынньыктара, 30№-дээх оскуола үөрэнээччилэрэ көмөлөстүлэр», — диэн иһитиннэрдэ Дмитрий Паньков.