Байыастарга 15 устуука «Сокол» квадроциклы ыыттылар

Өрөспүүбүлүкэ суһал ыстааба Саха сириттэн байыаннай дьайыыларга сылдьар байыастарга сэбинэн-сэбиргэлинэн уонна таҥаһынан-сабынан эбии хааччыйар үлэни ыытар.

Бүгүн, ыам ыйын 30 күнүгэр СӨ нэһилиэнньэҕэ куттал суох буолуутун хааччыйар судаарыстыбаннай кэмитиэтин бэрэссэдээтэлин солбуйааччы Яна Наумова брифиҥҥэ ол туһунан кэпсээтэ.

Ол курдук, бу күннэргэ Тирэх пууннарга Саха сириттэн байыаннай дьайыыга кытта сылдьар уолаттарга хаарынан, бадараанынан сылдьар 15 устуука «Сокол» квадроциклы тириэрдибиттэрин туһунан эттэ. Бэс ыйын саҥатыгар Тирэх пууннарга өссө 5 устуука маннык квадроциклы ыытары былаанныыллар.

Итини сэргэ бэс ыйын саҥатыгар «Саха сирэ эйигин кытары!» добровольческай ыстаап гуманитарнай көмө ыытыаҕа. Оттон өрөспүүбүлүкэ тэрилтэлэрэ байыаннай дьайыыга сылдьар байыастарбытыгар атын тырааныспардары ыытары былаанныыллар.