Байыаннай дьайыы кыттыылаахтарыгар уонна кинилэр дьиэ кэргэттэригэр өйөбүл эбии көрүҥнэрэ

Ил Дархан Айсен Николаев байыаннай дьайыы кыттыылаахтарыгар уонна кинилэр дьиэ кэргэттэригэр өйөбүл эбии көрүҥнэрин олохтуур туһунан саҥа ыйааҕа кэлим федеральнай өйөбүллэри тутуһууга (стандарт) олоҕурда.

Ол курдук, байыаннай дьайыы кыттыылаахтарын дьиэ кэргэттэрэ олорор дьиэлэрин төлөбүрүн ороскуотугар уонна хапытаалынай өрөмүөн усунуоһун төлөбүрүгэр 50 бырыһыан компенсация ылар бырааптаахтар. Маны таһынан, култуурунай тэрээһиннэргэ сылдьыыга чэпчэтиинэн туһаналлар. Байыаннай дьайыы кыттыылаахтарын оҕолоро өрөспүүбүлүкэ оскуолаларыгар эбии бэлэмнэнии бөлөхтөрүгэр босхо сылдьаллар.Төгүрүк суукканы быһа үлэлиир уһуйааннарга бастакы уочаратынан ылыллаллар, дьиэ кэргэн баҕарар буоллаҕына, оскуола үөрэнээччитэ олорор сиринэн оскуолаҕа көһүөн сөп. Араас куруһуоктарга, спортивнай сиэксийэлэргэ босхо сылдьаллар, спортивнай таҥаһынан хааччыллаллар.

Саҥа өйөбүл миэрэлэр олоххо киириилэрин бэрээдэктэрин  бырабыыталыстыба б.дь. сэтинньи 15 күнүгэр диэри бэлэмниэхтээх.

Бу туһунан СӨ Аҕа баһылыгын уонна бырабыыталыстыбатын пресс-сулууспата иһитиннэрдэ.