Байыаннай дьайыылар бэтэрээннэрин күннэрэ тэриллиэҕэ

От ыйын 1 күнэ Байыаннай дьайыылар бэтэрээннэрин күннэринэн биллэриллиэҕэ. Бу туһунан Федерация Сэбиэтин бэрэссэдээтэлин бастакы солбуйааччы Андрей Турчак РФ бэрэсидьиэнэ Владимир Путиҥҥа иһитиннэрдэ.

Байыаннай эпэрээссийэҕэ сылдьар саллааттарга көмөнү тэрийиигэ парламент иһинэн тэриллибит бөлөх салайааччыта Андрей Турчак иһитиннэрбитинэн, парламент байыастарга туһааннаах үгүс сокуону таһаарбыт. Ол курдук, 2014 сылтан Донбааһы көмүскээһиҥҥэ кыттыбыт саллааттар сокуонунан байыаннай дьайыылар бэтэрээннэрэ буолар кыахтаммыттара. Ону таһынан Үлэ кодексыгар уларыйыылар киирэннэр, байыаннай эпэрээссийэҕэ кытта сылдьар байыастар үлэлэрин дуогабара уһаан биэрбитэ. Юрист көмөтүгэр, кирэдьиит төлөөһүнүгэр эмиэ уларыйыылар киирбиттэрэ.

Андрей Анатольевич мунньах кэмигэр Арассыыйаҕа Байыаннай дьайыылар бэтэрээннэрин күнүн биллэрэргэ этии киллэрдэ.

— Саллааттарбытыгар араас көмөнү оҥорорбут таһынан кинилэр санааларын бөҕөргөтөр үлэни эмиэ умнубаппыт. Билигин үгүс эрэгийиэҥҥэ байыастары өйүүр, кинилэр хорсун быһыыларын дьоҥҥо-сэргэҕэ тарҕатар сыалтан, от ыйын 1 күнүн Байыаннай дьайыылар бэтэрээннэрин күннэринэн биллэрдилэр. Бу үтүө хамсааһыны федерация таһымыгар бигэргэтиэххэ диэн этиилээхпит, — диэн иһитиннэрэр кини.