Байыаннай дьайыыттан кэлбит саллааттары көрүстүлэр

Бүгүн, кулун тутар 29 күнүгэр, Дьокуускйа авиапуордугар байыаннай дьайыыттан кэлбит сулууспалаахтары көрүстүлэр. Балартан үс киһи 50 саастарын туолан диэмбэллэммит, оттон биир саллаат бааһыран чөлгө түһэриини ааһыахтаах.

Байыаннай сулууспалаахтары  доҕотторо, чугас дьоно уонна «Сахамедиа» тэрилтэ генеральнай дириэктэрин солбуйааччы Чокуур Гаврильев көрүстүлэр. Чокуур Гаврильев байыаннай эпэрээссийэттэн кэлбит дьоҥҥо саха уустара оҥорбут быһахтарын бэлэх уунна уонна бааһырбыт саллаакка чэгиэн доруобуйаны баҕарда.

«Төрөөбүт дойдубутугар этэҥҥэ эргиллэн кэлбиппититтэн наһаа үөрдүбүт. Сыл аҥаарын устата сулууспалаатыбыт. Өйөбүл, көмө иһин өрөспүүбүлүкэбит салалтатыгар махтанабыт», — диэн байыастартан биирдэстэрэ санаатын үллэһиннэ.