Байыаннай эпэрээссийэ буола турар сиригэр “Сокол” квадроцикллары ыыталлар

Бу нэдиэлэттэн Саха сиригэр оҥоһоллубут «Сокол» диэн ааттаах квадроцикл саҥа баартыйатын байыаннай эпэрээссийэ буола турар сиригэр ыытан саҕалаатылар. Ол туһунан СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков иһитиннэрдэ.

 Тиэхиньикэни Саха сирин байыастара сулууспалыы сылдьар сирдэригэр тиксэриэхтэрэ.

Дмитрий Лепчиков эппитинэн, өрөспүүбүлүкэ суһал ыстаабыгар байыаннай эпэрээссийэ балаһыанньатын кэтээн көрөр эспиэртиир сэбиэт тэриллибит. Манна киирэр чахчылары анаалыстаан, гуманитарнай көмөнү ханна тиксэрэр ордугун быһаараллар.

“Сайын кэлбитинэн билигин чараас таҥаһынан хааччыйыыга сүрүн болҕомтону уурабыт”, — диэн Лепчиков бэлиэтээтэ.