Дьокуускайга байыаннай эпэрээссийэ кыттыылаахтара доруобуйаны чөлүгэр түһэрии бырагырааматын чэрчитинэн, «Самородок» бассейнҥа гидрокенезотерапия кууруһун ааһыахтара.
Бу туһунан бүгүн, кулун тутар 9 күнүгэр, инбэлииттэр өрөспүүбүлүкэтээҕи социальнай-чэбдигирдэр киин дириэктэрэ Асида Алексеева брифиҥҥэ иһитиннэрдэ:
«Чөлгө түһэрии кууруһугар гидрокенезотерапия киирдэ. Бу дьарык бассейнҥа анал инструктордаах ыытыллыаҕа. Манна ууга физическэй эрчиллии киһини чөлгө түһүүтүгэр көмөлөһөр. Ууга эрчиллии эти-сиини, тыҥаны бөҕөргөтөр, утуйар уу тупсар, ону сэргэ киһи доруобуйата бөҕөргүүр, тымныйыыттан, дьаҥтан-дьаһахтан харыстанарга көмөлөөх. Бассейнҥа дьарыктар нэдиэлэҕэ иккитэ буолуохтара «, — диэн иһитиннэрдэ.
Бу бырагыраама чэрчитинэн, байыаннай дьайыы кыттыылаахтарыгар уонна кинилэр дьиэ кэргэттэригэр социальнай уонна уйулҕа өттүнэн, ону сэргэ уопсай доруобуйаларын туругар мэдиссиинэ көмөтө оҥоһуллар. Маны таһынан кииҥҥэ кинилэргэ эбии үөрэхтээһиҥҥэ, таһымы үрдэтиигэ, тус уйулҕа уонна психотерапевт көмөтө оҥоһуллар. Асида Алексеева иһитиннэрбитинэн, байыаннай дьайыы кыттыылаахтара суоппар, слесарь, веб-дизайнер, тиэхиньикэҕэ куттала суох буолуу инженердэрин идэлэрин интэриэһиргииллэр эбит.
Бүгүҥҥү күҥҥэ инбэлииттэр өрөспүүбүлүкэтээҕи социальнай-чэбдигирдэр кииннэригэр уопсайа 56 байыаннай дьайыы кыттыылааҕа уонна кинилэр дьиэ кэргэттэриттэн 19 киһи маннык кууруһу ааспыттар.
Сообщить об опечатке
Текст, который будет отправлен нашим редакторам: