Байыаннай эпэрээссийэҕэ анаан чүмэчи уонна борщ бэлэмнииллэр

Соҕурууҥҥу Саха сиринээҕи технологическай кэллиэс устудьуоннара байыаннай эпэрээссийэҕэ сылдьар дьоҥҥо анаан гуманитарнай көмөнү хомуйууга көхтөөхтүк кытталлар. Ол курдук, кинилэр Юлия Малофеева уонна Любовь Самигулина аахсыйаларын өйөөтүлэр.

Нерюнгри олохтооҕо Юлия биир санаалаахтарын кытта хатарыллыбыт борщ (сухой борщ), онтон Любовь окуопаҕа туһаныллар чүмэчини оҥороллор. Хатарыллыбыт борщу итии уу кутан хонууга сылдьан түргэнник бэлэмниэххэ сөп. Састааба көннөрү борщтан туох даҕаны уратыта суох. Манна наада: сүбүөкүлэ, биэрэс, моркуоп, хаппыыста, эт, томат паастата. Бэлэмнииллэригэр маны барытын буһаран баран, уутун электросушилканан ыган ылаллар, барытын бииргэ булкуйаллар, араас тума, суухара эбэллэр уонна ыйааһыннаан баран, бакыаттарга өлүүлээн кутаттыыллар.

Окуопаҕа туһаныллар бэйэ оҥоруу чүмэчи олус көдьүүстээх. Чүмэчини оҥорор бэрт судургу: хордуону ылан лиэнтэлии бааҥка үрдүгүттэн сантиметр курдук кылгастыы бысталыыллар, уруолуоннуу эрийэллэр уонна бааҥкаҕа угаллар. Үрдүгэр парафин куталлар. Орто кээмэйдээх чүмэчи 5 чаас курдук умайар. Маннык чүмэчи буруо таһаарбакка сылытар, сырдатар. Уокка уу оргутуохха, тугу эрэ буһарыахха, чүмэчи аттыгар атах таҥаһын куурдуохха сөп.

Кыргыттарга кэллиэс социальнай педагога Орлова Алена Юрьевна салайааччылаах устудьуоннар уонна үлэһиттэр улаханнык көмөлөһөллөр. Уопсайга олорор устудьуоннар оҕуруот аһыттан борщ бэлэмнээһиҥҥэ кытталлар. Ону тэҥэ, устудьуоннар идэлээх сойуустарын бастакы сүһүөх тэрилтэлэрин чилиэннэрэ уонна кэллиэстэн баҕа өттүнэн кыттыан баҕалаах устудьуоннар блиндажнай (окупа) чүмэчини оҥороллор. Кэллиэс үлэһиттэрэ бу хамсааһынтан эмиэ туора турбатылар, чүмэчини бэлэмнииргэ орбуочай миэстэни бэлэмнээтилэр уонна устудьуоннар матырыйаал хомуйалларыгар көмөлөһөллөр, байыаннай эпэрээссийэҕэ ыҥырыллыбыттарга миин нобуорун бэлэмнииргэ суухараны хатарсаллар.

Күн бүгүн устудьуоннар аймахтара кыргыһыы хонуутугар дойдуларын чиэһин хорсуннук көмүскүүллэр. Кинилэргэ устудьуоннар биллэр көмөнү оҥороллор. Үлэһиттэр уонна үөрэнээччилэр кыра күһүү түмтэххэ улахан кыайыы ситиһиллиэ диэн эрэллээхтэр!

Соҕурууҥҥу Саха сиринээҕи технологическай кэллиэс медиа киинэ.