Байыаннай госпиталларга үлэлээбит быраастар наҕараадаланнылар

Ахсынньы 30 күнүгэр Ил Дархан Айсен Николаев Москваҕа, Санкт-Петербурга, Севастопольга, Доннааҕы Ростовка байыаннай госпиталларга үлэлээбит миэдиктэри кытта көрүстэ.

Ил Дархан Саха сирин бары олохтоохторун уонна анал байыаннай эпэрээссийэ кыттыылаахтарын ааттарыттан бэйэлэрин баҕаларынан байыаннай госпиталларга үлэлээбит быраастарга махтанна.

«Бу — үтүө дьыала. Эһиги быраас идэтин ис дууһаҕытынан талан ылбыккытын дакаастаатыгыт», — диэтэ Айсен Николаев. Ил Дархан Саха сирин миэдиктэригэр дойдулаахтарын-байыаннай сулууспалаахтар ааттарыттан эрэ буолбакка, өссө байыаннай госпиталлар уонна РФ Оборонаҕа министиэристибэтин салалталарын ааттарыттан махтал тыллар этиллэллэрин бэлиэтээтэ.

Дьокуускай куораттааҕы 3 нүөмэрдээх балыыһа кылаабынай бырааһа Светлана Давыдова салайааччылаах, травматолог-быраас Анатолий Потапов уонна быраас-клиническэй психиатр Александр Григорьев кыттыылаах миэдиктэр бастакы биригээдэлэрэ  сэтинньи 11-27 күннэригэр академик Н.Н.Бурденко аатынан сүрүн байыаннай килиниичэскэй госпиталга, Москваҕа РФ Оборонаҕа министиэристибэтин А.А.Вишневскай аатынан Киин байыаннай килиниичэскэй госпиталга, М.С.Киров аатынан байыаннай-мэдиссиинискэй академияҕа, Санкт-Петербурга Арассыыйа Оборонаҕа министиэристибэтин 442-с килиниичэскэй байыаннай госпиталыгар уонна Доннааҕы Ростовка РФ Оборонаҕа министиэристибэтин 1602-с уокуруктааҕы байыаннай килиниичэскэй госпиталга үлэлээбит.

«Аан бастаан Саха сирин бааһырбыт байыастарыгар социальнай өйөбүлү оҥорбуппут. Онтон СӨ салалтатын суһал быһаарыытынан, байыаннай госпиталларга сүрүннүүр киин лиинийэтинэн уонна волонтердар үлэлэрэ тэриллибитэ. Онон биһиги сүрүн үлэбит быраас практическай көмөтүгэр туһаайыллыбыта», – диир Светлана Давыдова.

Быраастар иккис биригээдэлэрэ Ростовка уокуруктааҕы байыаннай 1602-с госпиталга ыытыллыбыт. Манна үлэ тута байыаннай быраастарга практическай көмөнү оҥорууга туһуламмыт. Хирург-быраас, Өлөөнтөн улуустааҕы киин балыыһа кылаабынай бырааһа Назар Петров абдоминальнай хирургия отделениетыгар үлэлээбит. Анатолий Слепцов – экстреннай хирургия отделениетыгар. Травматолог-быраас Сергей Васильев – госпиталь травматологическай отделениетыгар. Кинилэр бааһырбыттарга уонна эвакуацияҕа ыалдьыбыттарга мэдиссиинэ көмөтүн оҥорбуттар, эпэрээссийэҕэ көмөлөспүттэр, бэрэбээскилээбиттэр, отделениеларга сүбэ-ама биэрбиттэр. Психиатр-быраас, психотерапевт Туйаара Решетникова – психиатрия отделениетыгар үлэлээбит, бу хайысханан байыаннай-быраас хамыыһыйатын үлэтигэр кыттыбыт.

Быраастар биригээдэлэрин салайбыт, СӨ уопсастыбаннай доруобуйа уонна медицинскэй профилактика киинин кылаабынай бырааһа Алена Никитина кэллиэгэлэрин үлэтин салайбыт, анал байыаннай эпэрээссийэ кыттыылаахтарын — бааһырбыт уонна ыалдьыбыт байыастары уонна байыаннай госпиталь салалтатын кытары көрсүбүт. Ону таһынан, Алена Никитина  Севастопольга РФ Оборонаҕа министиэристибэтин Пирогов аатынан 1472-с муоратааҕы-байыаннай килиниичэскэй госпиталга үлэлээбит, салалтаны кытары сибээһи олохтообут.

Быраастар бэлиэтээбиттэринэн, Саха сириттэн барбыт байыаннай сулууспалаахтар салалта уонна Саха сирин бары олохтоохторун өйөбүлүн билэллэр итиэннэ байыаннай сулууспалаахтары сэргэ, кинилэр дьиэ кэргэттэригэр эмиэ чэпчэтиилэр олохтоммуттарыттан үөрэллэр. Быраастар анал байыаннай эпэрээссийэ кыттыылаахтарын доруобуйаларын чөлгө түһэрии кэлимсэ үлэтин тэрийиигэ этиилэри киллэрдилэр. Айсен Николаев РФ Оборонаҕа министиэристибэтин байыаннай госпиталларыгар быраастар салгыы баран үлэлиэхтэрэ диэтэ.

Ил Дархан быраастарга судаарыстыбаннай наҕараадалары туттарда. «СӨ үтүөлээх бырааһа» үрдүк аат өрөспүүбүлүкэтээҕи 2 №-дээх балыыһа – суһал мэдиссиинискэй көмө киинин травматолог-бырааһа, ортопед Анатолий Потаповка, СӨ уопсастыбаннай доруобуйа уонна медицинскэй профилактика киинин кылаабынай бырааһа Алена Никитинаҕа СӨ доруобуйа харыстабылын үтүөлээх үлэһитэ аат иҥэрилиннилэр.

Ил Дархан грамоталарынан өрөспүүбүлүкэтээҕи психоневрологическай диспансер кылаабынай бырааһа Туйаара Решетникова уонна бу диспансер психиатр-бырааһа Александр Григорьев, СӨ Доруобуйа харыстабылын судебнай-медицинскэй экспертиза Бюротун судебнай мэдиссиинэ эспиэрэ, быраас Анатолий Слепцов, «Гражданскай килбиэн» бэлиэнэн – 1 №-дээх өрөспүүбүлүкэтээҕи балыыһа — мэдиссиинэ национальнай киинин травматолог-ортопеда Сергей Васильев, Дьокуускай куораттааҕы 3 №-дээх балыыһа кылаабынай бырааһа Светлана Давыдова уонна Өлөөн улууһун киин балыыһатын кылаабынай бырааһа Назар Петров наҕараадаланнылар.

СӨ Ил Дархан уонна бырабыыталыстыба пресс-сулууспата.

Хаартыскаларга Дмитрий Ляшеев түһэриилэрэ.