Байыаннай хантараагы түһэрсибиттэри холуобунай эппиэтинэстэн босхолуохтара

Госдумаҕа дьокутааттар мобилизация уонна байыаннай балаһыанньа кэмигэр хантараак түһэрсибиттэри холуобунай эппиэтинэстэн босхолуур туһунан сокуон барылын киллэрдилэр.

Бу сокуон барылын балаһыанньата маннык сирэйдэргэ тарҕаныаҕа:

— кыра уонна орто ыар буруйу оҥорбут уорбаланааччыларга;

— буруйдаммыттарга (сокуоннай саастарын ситэ илик оҕолору кытта сибээстээх, Конституционнай тутулу уонна судаарыстыба куттала суох буолуутун утары,  ону тэҥэ терроризмы утары буруйу оҥорууларыттан ураты).

Ол курдук, уорбаланааччы хантараак түһэристэҕинэ холуобунай дьыалата тохтотуллар, оттон буруйдаммыттарга буруйу оҥоруу болдьоҕун боруостааһына «условнайга» уларытыллар. Кинилэри кэтээн көрүүнү байыаннай чаастар командованиелара ыытыахтара.

Хантараак түһэрсибит буруйданааччы байыаннай сулууспа кэмигэр атын буруйу оҥордоҕуна, бириигэбэри учуоттаан, урукку буруйу оҥоруу болдьоҕун боруостааһына уһаан уонна эбиллэн биэрэр. Аны туран байыаннай сулууспа кэмигэр хантараак түһэрсээччи судаарыстыбаннай наҕараада ыллаҕына, сокуон барылыгар олоҕуран буруйуттан босхолонор кыахтанар.

Сокуон ааптардара быһаарбыттарынан, маннык ис хоһоонноох  сокуон барыла урут ылыныллыбыта. Ол эрээри, билиҥҥи докумуон кылгас болдьохтоох. Быраактыка көрдөрбүтүнэн, саҥа мэхэньииһим олоххо көдьүүстээхтик үлэлиир, оччотугар быраап нуормаларын биир тиһигэ оҥоһуллара былааннанар диэн ТАСС суруйар.