«Байыаннай хомуурга барбыт уолаттарбыт этэҥҥэ эргиллэн кэлэллэрин күүтэбит»

Арассыыйа уонна Украина икки ардыларыгар үөскээбит уустук балаһыанньа аан дойду үрдүнэн элбэх киһини долгутар.

Сунтаар улууһугар «Лонкур» бааһынай хаһаайыстыба баһылыга Александр Попов санаатын үллэстэр:
» Ааспыт үйэ 80-с сылларыттан сүөһүгэ үлэлиибин. 1993 сылтан хаһаайыстыба тэриммитим. Төһө да ыраах пиэримэҕэ олордорбун, анал байыаннай эпэрээссийэ туһунан сонуннары истэ-билэ олоробун. Элбэх дьону долгутар, таарыйар иирсээн эйэлээх кэпсэтиинэн эрдэ түмүктэнэ оҕустар дии саныыбын.
Билигин тыа хаһаайыстыбатыгар араас үлэ хайысхатыгар улахан хаһаайыстыбалар, кэпэрэтииптэр тэриллэн эрэллэр. Онно үксэ 25-45 саастаах саамай үлэлиир-хамсыыр, кыайар-хотор эр дьоммут байыаннай хомуурга ыҥырыллан баран хаалаллара мунчаардар, ким үлэлиир диэн. Ханнык баҕарар киһи иирсээн, өйдөспөт буолуу буоларын баҕарбата чуолкай. Аҕам аармыйаҕа 1940 сыллаахха ыҥырыллан баран, үлэ фронугар сылдьыбыт бэтэрээн. Ийэм сэрии сылларын ыарахаттарын эт саннынан билбитэ. Онон кинилэртэн оҕо эрдэхпиттэн истэн, сэрии диэни абааһы көрө улааппыт киһибин.

Мобилизацияланан барбыт уолаттарбыт хайаан да кыайыы аргыстанан, этэҥҥэ эргиллэн кэллиннэр диэн баҕа санаалаахпын».