Байыаннай кэрэспэдьиэннэр хаартыскаларынан быыстапка туруон сөп

«Арассыыйа — мин устуоруйам»  түмэлгэ  Саха сирин байыаннай кэрэспэдьиэннэрэ түһэрбит хаартыскаларынан быыстапканы тэрийии туһунан  «Сахамедиа» холдинг шеф-эрэдээктэрэ, байыаннай кэрэспэдьиэн Федор Григорьев СӨ буойун-суруналыыстарын мемориальнай дуоскаларыгар сибэкки дьөрбөтүн ууруу кэмигэр эттэ.  

«Байыаннай дьайыы буола турар сиригэр үлэбитинэн командировкаларга сылдьыбыппыт. Олус элбэх хаартыска уонна видео матырыйаал мунньуллунна. Бу барыта хаһыакка  уонна сайтарна кыайан тахсыбаттар.  Матырыйааллар олус интэриэһинэйдэр. Ол иһин «Арассыыйа — мин устуоруйам» түмэлгэ  саха дьоно-сэргэтэ байыаннай дьайыыга  уонна Арассыыйа састаабыгар киирбит саҥа  сирдэри сөргүтүүгэ үлэлэспит  дьоммут туһунан экспозиция арыйар туһунан этии көтөҕөбүн. Мин санаабар, мусуой салалтата өйүө дии саныыбын, үлэлэспиппит ыраатта», — диэтэ кини.

Бэлиэтээн суруйдахха, «Сахамедиа» байыаннай кэрэспэдьиэннэрэ байыаннай дьайыы саҕаламмыт бастакы ыйдарыттан репортажтары оҥороллор, сырдаталлар.