Байыаннай кэрэспэдьиэннэргэ наҕараадалар туттарылыннылар

РФ Бырабыыталыстыбатын бэрэссэдээтэлин солбуйааччы – Уһук Илин Федеральнай уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев В.К.Арсеньев аатынан Бүтүн Арассыыйатааҕы «Уһук Илин» литературнай бириэмийэ иккис анал сиэссийэтин кыайыылааҕынан буолбут «Отважные» документальнай киинэ ааптарыгар уонна режиссеругар, суруналыыс Олеся Шигинаҕа («Ждём тебя!» номинация) наҕарааданы туттарда. Маны сэргэ, анал аатынан бу сайын от ыйыгар байыаннай дьайыы зонатыгар сырдык тыына быстыбыт РИА Новости бэлиитикэни ырытааччыта, байыаннай суруналыыс Ростислав Журавлёв үлэлэрэ сыаналаннылар. Сэртипикээт кини ийэтигэр Людмила Журавлеваҕа туттарылынна.

«Байыаннай дьайыы сиригэр-уотугар байыаннай кэрэспэдьиэннэр үлэлииллэр. Кинилэр улахан наадалаах дьыаланы оҥороллор — байыаннай дьайыы туһунан уонна босхоломмут территорияларга туох буоларын дьоҥҥо-сэргэҕэ тиэрдэллэр. Алта байыаннай кэрэспэдьиэн наҕараадаланна. Сорохтор — байыаннай дьайыы сиригэр-уотугар. Бу объективнай наҕараада. Биһиги куонкурус түмүгүн таһаарарга хаһан да кыттыспаппыт. Дьүүллүүр сүбэ профессионаллартан турар. Кинилэр ким кыайбытын этэллэр. Мин байыаннай дьайыы араас сиригэр-уотугар байыаннай кэрэспэдьиэннэри кытары көрсүбүтүм. Кинилэр байыастары уонна эйэлээх олоххо олорооччулары ситимнииллэр. Байыаннай кэрэспэдьиэннэр үлэлэрэ улахан суолталаах«, — диэн этэр Юрий Трутнев.

«Ждем тебя» киинэҕэ эр дьоннор, эдэркээн уолаттар хорсун-хоодуот быһыыларын, дьиэлэригэр оҕолорун, кэргэттэрин күүтэр ийэлэр тустарынан кэпсэнэр.

«Миэхэ бириэмийэни туттарбыттарын туһунан Донбааска истибитим. Ол туһунан байыастар эппиттэрэ. Миигин булар уустук, куруук кэлэ-бара сылдьабын. Киинэни устарга соҕотоҕун фронт линиятыгар барбытым. Кааската да, бронежилета да суох. Бэйэм массыынабынан. Олунньуга Бэрэсидьиэн сорудаҕынан “Кино на службе Отечества” Бүтүн Арассыыйатааҕы көһө сылдьар бастакы бэстибээл баар буолбута. Билигин биһиги университеттарга сылдьабыт, ыччаттары көрсөбүт, кэпсиибит«, — диэн этэр Олеся Шигина.

Ростислав Журавлёв 2014 сылтан «Крымская весна» сырдаппыт. 2014 с. от ыйыттан ахсынньыга диэри байыаннай дьайыы сиригэр-уотугар сылдьыбыт. 2021  сыллаахха РИА Новости кэлбит. Байыаннай дьайыы бастакы күннэригэр бастаан ДНӨ, онтон Харьков уобалаһыгар, ол кэнниттэн Запорожскай уобаласка командировкаҕа сылдьыбыт. 2022 сыллаахха кини  Арассыыйа суруналыыстарын Сойууһуттан «Кыһыл көмүс бөрүө» бириэмийэ «За смелость при выполнении журналистского долга» анал бириэмийэтин туппут. Бу сыл от ыйын бүтүүтүгэр матырыйаал бэлэмнии сылдьан сырдык тыына быстыбыт. Ийэтэ Людмила Журавлёва уолун сыаналаабыттарыгар махтаммыт. Бу төрдүс наҕараадата буоларын эппит.

Икки атын кыайыылаахха, Russia Today кэрэспэдьиэнигэр Андрей Филатовка  («Шаги к победе» номинация), МИЦ «Известия» Семён Ерёмиҥҥа (байыаннай дьайыыны тиһиктээхтик суруйуу иһин вице-премьер Юрий Трутневтан анал номинация) — наҕараадалары Юрий Трутнев быйыл алтынньы ый бүтүүтүгэр ДНӨ үлэтинэн сырыытыгар туттарбыт.

Бу иннинэ бастакы анал сиэссийэ кыайыылаахтара наҕараадаламмыттара. Онно кыайыылаахтарынан «Комсомольскай правда» анал кэрэспэдьиэнэ Дмитрий Стешин («Судьба человека на СВО»), суруналыыс Эльвира Мухаметдинова («Ждём тебя!»), Арассыыйа суруналыыһа, публицист уонна суруйааччы Евгений Норин («Шаги к победе»), WarGonzo бырайыак байыаннай репортера Дмитрий Селезнёв (байыаннай дьайыыны тиһиктээхтик суруйуу иһин Юрий Трутнев анал номинацията) буолбуттара.