Байыаннай сулууспалаах хат кэргэнэ, оҕото босуобуйа ылар буолуохтара

Бэс ыйын 28 күнүгэр түүннэри-күнүстэри үлэлиир эрэгийиэннээҕи 122 нүөмэрдээх “итии лииньийэ” салайааччыта Мария Винокурова иһитиннэрбитинэн, оҕо босуобуйаларын ылар дьон араҥалара кэҥээтэ.

— Ол курдук, аармыйаҕа сулууспалыы сылдьар уонна быстах хомуурга ыҥырыллыбыт байыаннай сулууспалаах хат кэргэнэ босуобуйаны ылыан сөп. Ону тэҥэ, аармыйаҕа сулууспалыы сылдьар уонна быстах хомуурга ыҥырыллыбыт байыаннай сулууспалаах оҕотун ийэтэ, эбэтэр эпэкиинэ, эбэтэр, оҕону көрөр-истэр чугас аймаҕа (эбэтэ-эһэтэ) эмиэ ылыахтарын сөп, — диэн Мария Винокурова эттэ.

Босуобуйа оҕо төрүөҕүттэн 3 сааһын туолуор диэри төлөнөр, ол эрээри, аҕата байыаннай сулууспаҕа сылдьарын тухары. Хас да оҕолоох буоллаҕына, хас биирдиилэригэр бэриллэр.

Босуобуйаны ыларга сайабылыанньаны байыаннай сулууспалаах сулууспата бүппүтэ 6 ыйын хойутаппакка бэриллиэхтээх.

Төлөбүр икки көрүҥнээх:

— ыҥырыынан байыаннай сулууспаны бара сылдьар сулууспалаах хат кэргэнигэр биирдэ бэриллэр босуобуйа (олорор сиртэн тутулуктанан, 50 790 солкуобайтан саҕаланар);

— ыҥырыынан байыаннай сулууспаны бара сылдьар сулууспалаах оҕотугар ый аайы бэриллэр босуобуйа (21 767 солкуобайтан саҕаланар).

Сайабылыанньаны “Госуслуги” портал, “Мин докумуоннарым” киин, Социальнай пуонда нөҥүө биэриэххэ сөп.

Ил Дархан, бырабыыталыстыба дьаһалтатын пресс-сулууспата.