Байыаннай сулууспалаахтар дьиэ кэргэттэригэр биир кэмнээх төлөбүр чугастааҕы кэмҥэ түмүктэниэ

Байыаннай сулууспалаахтар дьиэ кэргэттэригэр биир кэмнээх төлөбүр чугастааҕы кэмҥэ түмүктэниэ

Ааптар:
02.11.2022, 10:30
Бөлөххө киир:

Айсен Николаев: байыаннай хомуурга барбыт дьон дьиэ кэргэттэригэр биир кэмнээх 200 тыһ.солк. төлөбүрү тириэрдии үлэтин чугастааҕы күннэргэ түмүктүүргэ соруйда.

СӨ Ил Дархана Айсен Николаев сэтинньи 1 күнүгэр байыаннай хомуурга барбыт дьон дьиэ кэргэттэригэр социальнай өйөбүл боппуруостарынан мунньаҕы ыытта.
«Өрөспүүбүлүкэҕэ быстах хомуур тохтоото. Билигин сүрүн боппуруос — байыаннай сулууспалаахтар дьиэ кэргэттэригэр өйөбүлү оҥоруу. 200 тыһ.солк. биир кэмнээх төлөбүрү тириэрдии үлэтин чугастааҕы күннэргэ түмүктүөххэ наада. Байыастарга улахан көмөбүт, тыылга кинилэр дьиэ кэргэттэригэр өйөбүлбүт», — диэн бэлиэтиир Айсен Николаев.

Мунньахха биир кэмнээх төлөбүрү оҥорууга нуорума-быраап аакталарыгар суруллубатах биирдиилээн түбэлтэлэр боппуруостара дьүүллэһилиннилэр. СӨ Үлэҕэ уонна социальнай сайдыыга министиэристибэтэ төлөбүрү биэрии бэрээдэгэр уларытыылары киллэрбит. Ол курдук, байыаннай хомуурга барбыт киһи дьиэ кэргэнэ, аймахтара суох буоллаҕына, биир кэмнээх төлөбүрү ыларга бэйэтэ киирэр. Маны сэргэ, биир байыаннай сулууспалаахха хас да киһиттэн сайабылыанньа киирдэҕинэ уонна мөккүөр үөскүүр түгэнигэр, харчы мобилизацияламмыт киһи тус бэйэтин счетугар ыытыллар.

Эрэгийиэҥҥэ билигин байыаннай сулууспалаахтар дьиэ кэргэттэрин өйүүр миэрэлэргэ бастакы миэстэҕэ оҕолорго социальнай чэпчэтиилэри көрүү туһунан боппуруостар тахсаллар:  оскуолаларга итии аһылыгы тэрийии, оҕо саадыгар кырачааны биэрии, орто анал уонна үрдүк үөрэх кыһаларыгар үөрэнэр устудьуоннарга истипиэндьийэни төлөөһүн туһунан.

Ил Дархан муниципалитеттар уонна туһааннаах министиэристибэлэр таһымнарыгар хойутааһын баарын бэлиэтээн туран, Бырабыыталыстыбаҕа бу соругу быһааралларыгар ыйда.

Мунньахха Айсен Николаев госпитальга эмтэнэ сытар бааһырбыт байыастарга көмөнү оҥорорго уонна салгыы доруобуйаларын чөлгө түһэрэллэригэр табыгастаах үлэни тэрийэллэригэр соруйда.

Биир ситимнээх сүрүннүүр кииҥҥэ бу дьыалаҕа үлэни тэрийэргэ, дойду киин куораттарыгар олорор Саха сирин дьонун кытыннарарга сорудахтанна. Маны сэргэ, Ил Дархан байыастары материальнай-тэхиньиичэскэй өттүнэн хааччыйыыны салгыырга эттэ. Бу байыаннай чаастарга эрэ буолбакка, бэлэмнэниини бара сылдьар уонна СВО зонатыгар баар дойдулаахтарбытыгар эмиэ туһуланарын ыйда.

Санатан эттэххэ,  СӨ Ил Дарханын ыйааҕын чэрчитинэн, байыаннай сулууспалаахтар дьиэ кэргэттэрин өйүүр миэрэлэргэ 200 тыһ.солк. биир кэмнээх көмө төлөбүр, уһуйааҥҥа төлөбүртэн босхолонуу, оскуолаларга 5-11 кылаас оҕолорун оскуола остолобуойугар босхо аһатыы, доруобуйаны чэбдигирдэр лааҕырдарга оҕолорго босхо путевканы биэрии, үрдүк үөрэх уонна орто анал үөрэх кыһаларыгар өрөспүүбүлүкэ бүддьүөтүн суотугар тус сыаллаах босхо үөрэх,  үрдүк уонна орто анал үөрэхтэргэ үөрэнэр ыччакка үрдэтиллибит истипиэндьийэни анааһын, байыаннай сулууспалаахтар төрөппүттэрэ санаторийга, куруорка эмтэнэллэрин хааччыйыы, гааһы киллэттэриигэ субсидия туһунан, уо.д.а. этиллэр.

Андрей Сорокин (СИА) хаартыскаҕа түһэриитэ

Лента
Салгыы
7 декабря
  • -38°C
  • Ощущается: -38°Влажность: 67% Скорость ветра: 0 м/с