Байыаннай сулууспалаахтар доруобуйаларын чөлүгэр түһэрэллэр

Инбэлииттэри  биир кэлим реабилитациялыыр социальнай-чэбдигирдэр киин базатыгар байыаннай эпэрээссийэ  кыттыылаахтарын уонна кинилэр дьиэ кэргэттэрин доруобуйаларын чөлүгэр түһэрии үлэтэ  салҕанар.

Ол туһунан Киин дириэктэрэ Асида Алексеева иһитиннэрдэ.

«Байыаннай эпэрээссийэ кыттыылаахтарыгар “Самородок” бассейҥҥа дьарык туһалааҕа көстөр, манна гидрокинезотерапия ньыматынан доруобуйаларын  чөлүгэр түһэрэллэр.  Эрчиллиилэр нэдиэлэҕэ иккитэ ыытыллаллар.  Эмтэнээччилэр доруобуйалара биллэ тупсар, тулуурдаах буолаллар,  уйулҕалара уоскуйар. Бассейҥҥа дьарыктаныы стресстэн босхолуур, уйулҕа туругун тупсарар, настарыанньаны көтөҕөр”, — диир Асида Алексеева.

Ону таһынан иппотерапияҕа улахан болҕомто ууруллар.

Биир кэлим бырагыраама чэрчитинэн байыаннай дьайыы кыттыылаахтарыгар уонна кинилэр дьиэ кэргэттэрин чилиэннэригэр  организм функциональнай туругун чөлүгэр түһэрэргэ,  бэйэ тус кыаҕынан  үлэлии үөрэнэллэригэр хайысхаламмыт  социальнай-психологическай уонна социальнай-мэдиссиинискэй көмө оҥоһуллар.   Кинилэргэ бэйэ биисинэһин арыйарга, федөральнай уонна эрэгийиэннээҕи төлөбүрдэр тустарынан кэпсииллэр, сүбэлииллэр-амалыыллар.

“Бу дьаһаллар бары байыаннай сулууспалаахтар доруобуйаларын түргэнник чөлүгэр түһэрэллэригэр көмөлөһөллөр”, — диэтэ доруобуйаны чөлүгэр түһэрэр киин дириэктэрэ.