Байыаннай сулууспалаахтар ыал буолалларын регистрациялааһыны түргэтэтии туһунан

2023 сыл саҕаланыаҕыттан суукканы быһа үлэлиир “122” “быһа сибээскэ” 23 813 төгүл эрийэн тиийдилэр.

Сулууспа салайааччыта Мария Винокурова  нэдиэлэ аайы ыытыллар брифиҥҥэ  иһитиннэрбитинэн, элбэх боппуруос ортотугар ыал буолааччылары регистрациялааһын хаамыытын түргэтэтии, оҕо босуобуйатын оҥоруу туһунан ыйытыылар киирэ тураллар.

«Бу сыл муус устарыттан байыаннай сулууспалаахтар  ыал буолалларын уонна оҕо төрөөһүнүн туһунан  сайабылыанньаларыгар  байыаннай чаас  хамандыыра эбэтэр байыаннай госпиталь начаалынньыга илии баттыыллара көҥүллэммитэ.

Саҥа судургутуллубут быраабылаларынан, өскөтүн байыаннай сулууспалаах  сайабылаынньа суруйа ЗАГС-ка кэлэр кыаҕа суох буоллаҕына, туспа сайабылыанньаны суруйар кыахтаах. Илии баттааһына кырдьыктааҕын госпиталь, санаторий эбэтэр атын байыаннай-мэдиссиинискэй тэрилтэ начаалынньыга, кини солбуйааччыта эбэтэр кинилэр суох буоллахтарына, ыстаарсай  дьуһуурунай быраас, байыаннай чаас хамандыыра  бигэргэтэр кыахтаахтар.  Ол гынан баран, ыал буолалларын регистрациялыылларыгар кэргэнниилэр тус бэйэлэрэ  сөбүлэҥнэрин биллэрэ ЗАГС-ка кэлиэхтээхтэр.  Байыаннай сулууспалаах кыттыыта суох кинини ыал оҥорор табыллыбат”, — диэн салайааччы Мария Винокурова  быһаарда.