Байыаннай-тактическай күрэхтэһиилэр: Кыайыы иһин!

Бэҕэһээ “Путь воина” байыаннай-тактическай күрэхтэһиилэр аһыллыылара буолбута. Бүгүн сарсыардаттан  икки хамаанда – Саха сириттэн «Боотур» уонна Хабаровскай кыраайтан «Амур буойуннара» хамаандалар киирсэ сылдьаллар.

Манна барыта дьиҥнээх курдук, байыаннай таҥаһы кэтэллэр, дроннары, о.д.а. тэриллэри тутталлар. Бастакы күн эбиэт иннинэ «Боотур» хамаанда кыргыһыы хонуутугар бэйэтин дьоһуннаахтык көрдөрдө, 4009 миэтэрэ уһуну ортотунан 5,37 км/ч түргэнник аастылар. Бу үрдүк бэлэмнэниини уонна кыайыыга дьулууру туоһулуур.

«Амур буойуннара» да хаалсыбаттар, 3 510 миэтэрэни ортотунан 3,59 км/ч сүүрдүлэр. Кинилэр тулуурдарын уонна дьулуурдарын хайгыахха эрэ сөп, атын дойду оҕолоро биһиги айылҕабытыгар, сирибитигэр-уоппутугар сылдьа үөрүйэҕэ суохтар.

Маннык күрэхтэһиилэр кыттааччылар эт-хаан өттүнэн бэлэмнээх буолалларын таһынан, кинилэргэ хамаанданан үлэҕэ, стратегия уонна охсууну тулуйар дьоҕур курдук суолталаах хаачыстыбалары иитэллэр. Кытаанах күрэхтэһии усулуобуйатыгар, кыайыы туһунан санаа күүстээх хамсатааччы буолар, хамаандаларга ханнык баҕарар ыарахаттары туоруурга көмөлөһөр.

Бүгүн Хабаровскай кыраай уонна Волгоградскай уобалас хамаандалара Дьркуускай куорат кэрэ-бэлиэ миэстэлэригэр, түмэллэргэ сылдьыахтара. Сарсыҥҥыттан күрэхтэһиигэ киириэхтэрэ.

Санатан эттэххэ, «Путь воина» байыаннай-тактическай күрэхтэһии РФ бырабыыталыстыбатын бэрэссэдээтэлин солбуйааччы — РФ бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, «ВОИН» киин кэтээн көрөр сэбиэтин бэрэссэдээтэлэ Юрий Трутнев көҕүлээһининэн ыытыллар.